InfoHub Logo

Burynǵy zamanda bir baıdyń bir ıt, bir mysyǵy bar eken. Iti kári, mysyǵy jas eken. Kúnderdiń birinde álgi baı ıt pen mysyqqa jumys tapsyrypty. Ol:

— Ekeýleriń ana aýyldaǵy qyzyma myna altyn júzikti aparyp kelińder, mysyq sen júzikti alyp júr. It saǵan jol bastasyn, saqtanyp júrińder, júzikti joǵaltyp qoımańdar, — deıdi.

Olar jolǵa shyǵyp, jarym jolǵa kelgende aldarynan bir ózen kez bolady. Ózende kópir joq eken, sonan olar ózennen maltap ótbek bolady. Mysyqtyń maltaýǵa onsha sheber emes ekenin biletin ıt júzikten alańdap:

— Eı, mysyq, ózennen ótkenshe júzikti maǵan ber, sen joǵaltyp alasyń, — deıdi.

— Bolmaıdy, — deıdi mysyq, — qojaıyn maǵan: «Júzikti sen alyp júr» degen, saǵan bere almaımyn.

— Men saǵan qaraǵanda muqıattaýmyn, ózennen ótkenshe júzikti maǵan ber, aýzyma salyp alaıyn, ózennen ótken soń ózińe beremin, — deıdi ıt.

Aqyry, mysyq júzikti ıtke beredi. Olar ózenniń ortan beline barǵanda ıt:

— Oıbaı! Júzik aýzymnan túsip ketti, — deıdi.

— Endi qaıttik! — deıdi mysyq.

— Men izdep kóreıin — deıdi ıt. Alaıda qansha izdegenimen júzikti taba almaıdy. Aqyry olar jaǵdaıdy qojaıynǵa aıtý úshin úıge qaıtady. Úıge taıaǵanda ıt jazalanýdan qorqyp, ormanǵa kirip, ǵaıyp bolady.

Mysyqtyń tez qaıtyp kelgendigin kórgen qojaıyn alańdap:

— It qaıda? — deıdi.

— Júzikti joǵaltyp qoıyp qashyp ketti, — deıdi mysyq. Ashýlanǵan baı ıttiń tanaýyn tartpaq bolyp, aýyldaǵy basqa ıtterdi jınap alyp olarǵa:

— Qaıtseńder de álgi ıtti taýyp kelińder, — deıdi.

— Biz ol ıtti basqa beıýaz ıtterden qalaı paryqtaımyz? — dep suraıdy álgi ıtter.

— Ol erekshe qartaıyp ketken, aýzynda bir de tis joq, sender onyń tisine qarasańdar, ońaı tanı alasyńdar, — deıdi baı.

Sonymen, ıtterdiń barlyǵyn álgi kári ıtti ustap kelý úshin jan-jaqtan izdeýge attandyrady. Talaı taý-tasty basyp izdeýge attanady. Olar talaı taý-tasty basyp, ózen-toǵaıdy aralap, alys-jaqyndaǵy qalalardyń barlyǵyna barady. Alaıda álgi ıtti eshqandaı jerden taba almaıdy. Kúni búginge deıin ıtter altyn júzikti, sol ıtti taba almapty. Sol úshin qazir de ıtter birin-biri kórip kezdese qalǵanda «Baıdyń altyn júzigin joǵaltqan ıt men emes, senbeseń qarap kór, tisim saý» dep tisterin aqsıtyp, yryldap qoıady eken.

---