Muǵalimder túlekterdi UBT pýnktterine jetkizýge mindetti me
Májilis depýtaty Irına Smırnova UBT men muǵalim mártebesine qatysty Úkimet basshysynyń atyna depýtattyq saýal joldady.
«Muǵalim mártebesi osyǵan deıin qoǵamda kóp ret talqylanǵany belgili. Alaıda Bilim jáne ǵylym mınıstrliginiń, ákimdikterdiń muǵalimge degen qolaıly jumys kúshi men kópshilik sharalarǵa jumyldyrý sekildi qarym-qatynasy mekteptiń ónegeli qundylyqtaryn burmalaýǵa alyp keledi», - dedi ol Májilistiń jalpy otyrysynda.
Sonymen qatar ol 2017 jyldan bastap túlekterdiń qorytyndy attestasıasyn, mektep emtıhandaryn júrgizýdiń jańa formaty engizilgenin eske salyp ótti. Mektepti támamdaýǵa arnalǵan shara atestattardy tapsyrýmen aıaqtalady. Osy oraıda oqýshy men mekteptiń resmı túrdegi ózara qarym-qatynasy aıaqtalady.
«Biraq ta burynǵy túlekterge qatysty qyzmettik quqyqtary men mindetteri bolmasa da, mektep ákimshiligi men muǵalimder talapkerlerdi UBT pýnkterine jetkizýge jaýapty etip taǵaıyndalady. Osy másele boıynsha biz 2017 jyly depýtattyq saýalǵa bastamashylyq etken bolatynbyz. Bul rette berilgen jaýapta Bilim jáne ǵylym mınıstrligi men jergilikti atqarýshy organdar 2018 jyly UBT-ny ótkizýdi uıymdastyrý prosesinde muǵalimderdi qatystyrmaý máselesin pysyqtap jatqany aıtylǵan. Alaıda bul málimdeme tek sóz júzinde qalyp otyr. Proses qaıtalanyp jatyr», - dedi Irına Smırnova.
Depýtat mektepke, muǵalimderge degen osyndaı qatynas tutynýshylyq maqsatta jasalyp jatqanyn ári zańsyz ekenin atap ótti. Bul óz kezeginde pedagogtyń mártebesin tómendetedi.
«Bilim jáne ǵylym mınıstrligi men ákimdikter UBT-ny tapsyrý, oǵan qatysý, testileý nátıjeleri árbir talapkerdiń jeke isi ekenin túsinýi tıis. Osyǵan baılanysty mektep muǵalimderin UBT-ny uıymdastyrý mindetinen bosatý qajet dep sanaımyz. Muǵalimder eńbegin ózderine tán emes qyzmet túrlerine paıdalanǵan qısynsyz», - dedi ol.
Óz kezeginde Májilis tóraǵasy Nurlan Nyǵmatýlın áriptesiniń aıtqanyn qoldaı kele, máseleniń ózekti ári ýaqytyly kóterilip otyrǵanyn atap ótti.
Budan buryn habarlanǵandaı, bıyldan bastap QR Bilim jáne ǵylym mınıstrligi Ulttyq biryńǵaı testileý nátıjesi boıynsha mektepterdiń arasynda reıtıń júrgizbeıdi.
QazAqparat
You Might Also Like
-
Qaı eldiń bolmasyn damýynda ulttyq mádenıetti órkendetýdiń mańyzy orasan zor. Qazaq eli de osy jolmen júrip keledi. Mádenıeti damymaǵan halyqtyń keleshegi de joq. Tek ulttyq mádenıetin órkendetkende...
-
9 jáne 10-maýsymda Almaty qalasyndaǵy Ortalyq demalys jáne mádenıet saıabaǵynda halyqaralyq Dostyq Kúnine oraı VI Unity Fest otbasylyq festıvali ótti.
