InfoHub Logo

Mamyrda muǵalimderdi attestasıadan ótkizý jumystary bastalady. Bul týraly halyqpen eseptik kezdesý ótkizgen QR Bilim jáne ǵylym mınıstri Erlan Saǵadıev aıtty.

«Muǵalimderdi attestasıadan ótkizýdiń jańa júıesi, testileý suraqtary daıyn. Testileý jumystaryn kelesi aıdan bastaımyz. Búgingi kúni alpys myń muǵalim óz erkimen osy testileý attestasıasyna jazyldy. Ol bizge ne kórsetedi? Muǵalimderimiz - bilimdi, sabaqtaryn biledi, ózine senimdi, testileýden qoryqpaıdy», - dedi Erlan Saǵadıev.

Sonymen qatar mınıstr jańartylǵan bilim mazmunyna kezeń-kezeńmen kóshý jalǵastyrylyp jatqanyn aıtty.

«Byltyrǵy jyly 1, 2, 5, 7 synyptar ótti. Jańa oqý baǵdarlamasy men jańa oqýlyqtar kezeń-kezeńmen daıyndalýda. Aldaǵy 2018 oqý jylynan bastap 3, 6, 8 synyptar qosylyp, jańartylǵan bilim berý mazmunyna kóshý 70 paıyzǵa oryndalady dep esepteýge bolady. Jańa oqýlyqtar daıyn. «Qoǵamdyq baǵalaý» portalynda maketteri qoıyldy jáne aprobasıa júrgizilýde»,- dedi ol.

Mınıstrdiń atap ótýinshe, 10-11 synyptarda 4 pándi aǵylshyn tilinde oqytý boıynsha da kóp daıyndyq jumystary júrgizilýde.

«Ol oqýlyqtardy, metodıkalyq keshendi daıyndaý, muǵalimderdiń daıyndyǵyn arttyrý jáne ata-analarmen, muǵalimdermen talqylaýdy jalǵastyryp otyrmyz. Onyń sebebi bizge daıyndyqty naqty túsiný qajet», - dedi Erlan Saǵadıev.

Mınıstrdiń aıtýynsha, ótken jyly 12 myńnan astam muǵalim aǵylshyn tili kýrstarynan ótken. Búginde olardyń basym bóligi óz erikterimen A2-den bastap V2-ge deıingi kýrstarǵa jazylǵan.

QazAqparat

---