InfoHub Logo

Bul kúı halyq arasynda «Áýppálı, bópem-aı», «Jetim qyz», «Muńly qyz» degen ataýlarǵa ıe. Kóp taraǵan aty — «Muńly qyz». Kúıdiń de, ańyzdyń da birneshe nusqalary bar. Sol ańyzdardyń birinde bylaı delinedi:

Bir jigit ákeden jastaı jetim qalyp, sheshe tárbıesinde ósedi. Tentek atanyp ósken ol betine eshkimdi keltirmepti. Sheshesiniń «múmkin, toqtar» dep úılendirgen nıetinen eshteńe shyqpaıdy. Áıeli ul bala týady, biraq toqtaýyna ol da septespeıdi.

Aqyry sol eldiń aýqatty áýletterimen syıyspaı, elden shettep ketedi. Mańaıyna adam toptap, baılarǵa bórideı tıedi. Bir kúni ózi joqta elin qaraqshylar shaýyp, aýyldy aıaýsyz masqaralap, qyryp-joıady. Qan sasyǵan aýylda jigittiń qaryndasy men jalǵyz balasy ǵana tiri qalypty.

Aǵasynyń jas balasyn arqalaǵan qyz, jigittiń bekingen jerine kelip, aǵasyna sheshesi men jeńgesiniń, búkil aýyl azamattarynyń qazasyn estirtipti. «Jigit kek alý jolynda atqa minedi», — dep aıaqtalady shejire-sóz. «Áýppálı, bópem-aı» nemese «Muńly qyz» kúıi ómirge osylaı kelipti.

 

---