Ólsem, ornym qara jer syz bolmaı ma?
Ótkir til bir uıalshaq qyz bolmaı ma?
Mahabbat, ǵadaýat¹ pen maıdandasqan,
Qaıran meniń júregim muz bolmaı ma?

Amalsyz taǵdyr bir kún kez bolmaı ma?
Bireýge jaı, bireýge tez bolmaı ma?
Asaý júrek aıaǵyn shalys basqan
Jerin taýyp artqyǵa sóz bolmaı ma?

Sonda jaýap bere alman men bıshara,
Sizderge erkin tıer, baıqap qara.
Eki kúımek bir janǵa ádilet pe?
Qany qara bir janmyn, jany jara.

Júregińniń túbine tereń boıla,
Men bir jumbaq adammyn, ony da oıla.
Soqtyqpaly, soqpaqsyz jerde óstim,
Myńmen jalǵyz alystym, kiná qoıma!

Jasymda albyrt óstim, oıdan jyraq,
Aılaǵa, ashýǵa da jaqtym shyraq.
Erte oıandym, oılandym, jete almadym,
Etekbasty kóp kórdim elden biraq.

Oı kirgeli tımedi erik ózime,
Sandalmamen kún keshken túspe izime.
Ózi ermeı, erik bermeı, jurt qor etti,
Sen esirke, tynysh uıyqtat, baq sózime!

İshim tolǵan ý men órt, syrtym dúrdeı,
Men kelmeske ketermin túk óndirmeı.
Óleń shirkin — ósekshi, júrtqa jaıar,
Syrymdy toqtataıyn aıta bermeı.

¹Ǵadaýat (arabsha) — dushpandyq, ashý, jek kórý

---