InfoHub Logo

Uly Otan soǵysy jáne eńbek ardageri, tarıh ǵylymdarynyń doktory, profesor, Qazaqstan Respýblıkasyna eńbek sińirgen qaıratker, QR UǴA Qurmetti akademıgi Ýahıt Hamzauly Shálekenov 96 jasynda ómirden ótti.

1973 jyldyń tamyz aıynda ál-Farabı atyndaǵy Qazaq memlekettik ýnıversıtetiniń jańadan ashylǵan «Arheologıa jáne etnografıa» kafedrasyna profesor bolyp kelip, 1973-1986 jyldary kafedra meńgerýshisi, tarıh fakúltetiniń dekany bolyp jumys istegen Ýahıt Hamzauly osy qyzmetterdi atqarýda óziniń uıymdastyrýshylyq, ustazdyq jáne ǵylymı qabilettiligin is júzinde kórsetti. Arheologıa jáne etnografıa salasy boıynsha mamandar daıyndaý máselesin jolga qoıyp, kafedranyń ósip-órkendeýine zor úlesin qosty. Ýnıversıtet qabyrǵasynda jarty ǵumyryn ótkizip, sol kezeń aralyǵynda tarıh ǵylymynyń damý jolyna óziniń úlken úlesin qosyp ketti.

Ýnıversıtette qyzmet atqara bastaǵan jyldan bastap, arheologıa jáne etnografıa kafedrasyn bilimdi ári bilikti mamandarmen tolyqtyrýǵa asa mán berdi. Elimizdegi asa tanymal ǵalymdardy kafedraǵa dáris oqýǵa shaqyrý arqyly bolashaq mamandardy daıarlaýǵa kóp kóńil bólgendigin kóre alamyz. Sonymen birge, fakúltetimizde bilim alǵan jas mamandardy qabiletine qaraı jumysqa alyp qalý dástúrin qalyptastyrdy. Bul úrdis búgingi kúnge deıin óz jalǵasyn taýyp kele jatyr. Qazirgi kúni fakúltet oqytýshy-professorlarynyń kóp bóligi osy fakúltette bilim alǵan daryndy túlekter.

Ýahıt Hamzaulynyń fakúltet damýyna qosqan taǵy bir úlesi retinde fakúltet stýdentterdi praktıkadan ótetin arheologıalyq bazany qalyptastyrýyn aıtýǵa bolady. 1974 jylǵa deıin stýdentterdiń arheologıalyq-etnografıalyq praktıkasy ár aýmaqta ótkizilip kelse, osy máseleniń qolǵa alynýymen Jambyl oblysy, Shý aýdanynda ornalasqan Aqtóbe ortaǵasyrlyq qalasyn stýdentter praktıkadan ótetin baza retinde bekitildi.

Ý.H. Shálekenovtiń Qazaq ulttyq ýnıversıtetinde ǵylymmen jáne pedagogıkalyq qyzmetpen aınalysyp, túrik halyqtarynyń, sondaı-aq qazaq halqynyń tarıhy, arheologıasy men etnologıasy salasynda jemisti eńbek etti. Ortaǵasyrlyq Aqtóbe qalasyn zertteýdiń negizinde «Qum basqan qala» atty monografıasy jaryq kórgen. Joǵary oqý oryndaryna arnalǵan «Álem halyqtarynyń etnografıasy» atty oqýlyǵy bar. Ǵalymnyń 200-den astam ǵylymı pedagogıkalyq eńbegi bar, onyń 20-dan astamy jeke kitap bolyp shyqqan.

Kórnekti ǵalym, qadirli ustazdyń bilim salasyna, sonyń ishinde tarıh ǵylymyna qosqan úlesi orasan zor. Biz sekildi jas mamandardyń bolashaq baǵdaryn aıqyndaýda Ýahıt Hamzaulynyń ómir joly úlgi bolary anyq.

Kósherbaeva J.B.

Ál-Farabı atyndaǵy Qazaq Ulttyq ýnıversıteti

Tarıh, arheologıa jáne etnologıa fakúlteti

«7M01601 – Tarıh» mamandyǵy, 1 kýrs magıstrant

---