InfoHub Logo

Jaqynda T. Júrgenov atyndaǵy óner akademıasynda «Keskindeme jáne músin», «Beıneleý óneriniń tarıhy men teorıasy» kafedrasynyń uıymdastyrýymen jazýshy, ǵalym Jumabaı Qaırambaıdyń «Ónermen órilgen ómir» atty kitabynyń tusaýkeseri ótti. Jıynǵa Baıtursyn Esjanuly, Turdaqyn Jeksenbaı, Kerimbaı Qystaýbaev, Aman Qulbaev, Baýyrjan Baıdilda syndy zıaly qaýym ókilderi qatysty. 
 

Jıyn barysynda avtor atalǵan eńbekti jazýdaǵy basty maqsatyna toqtaldy. Kitaptyń jaryq kórýine belgili sýretshi, keskindemeshi, Qazaqstan Respýblıkasyna eńbegi sińgen qaıratker, «Eren eńbegi úshin» medaliniń ıegeri, profesor, Qyrǵyz Ulttyq Kórkemsýret Akademıasynyń akademıgi Jumaqyn Qaırambaevtyń ómiri men óneri arqaý bolǵan. Kitaptyń bas keıipkeri Italıadaǵy iri sýret kórmesinde óz týyndysyn tanystyrǵanda, sheteldik sýretshiler qazaq halqynda mundaı óner múlde bolmaǵan dep tańdanysyn bildiripti. Sonda sýretshi múdirmesten ata-babalarymyzdyń erte ǵasyrdan-aq tasqa qashap sýret salǵandyǵyn aıtqan. Osy oqıǵany tilge tıek etken Jumabaı Qaırambaı: «Qazaq erteden ónerli halyq. Kitapta keskindeme, sýret óneriniń qyr-syryna úńildim. Oqyrmandar, jastar osy ónerge qyzyǵyp, damytamyz dese, quba-qup», – dedi.  Keskindeme óneriniń keńinen tanylýyna úles qosqan sýretshiniń kórkem shyǵarmalary elimizdiń murajaılarymen qatar, shetel qorlarynda da saqtaýly. 
 

İs-sharanyń ekinshi bóliminde «Alash» syılyǵynyń laýreaty, jazýshy Turdaqyn Jeksenbaı: «Jumaqynnyń tili jeńil, sóz baılyǵy mol. Árbir jastyń oı-órisin kórkem ádebıet jetildiredi. Al qolymyzdaǵy kitap qazaqtyń kesindeme ónerin nasıhattap qana qoımaıdy. Sondaı-aq, óreli ónerdi ónegeli sózben jetkizetindigin» aıtyp, jınaqtyń tusaýyn kesti. 
  Jıyn sońynda aqyn Maraltaı Raıymbek jyr oqyp, ánshi Ramazan Stamǵazıev «Eki jırendi» naqyshyna keltire oryndap, kórermen yqylasyna bólendi.

---