InfoHub Logo

Áleýmettik jelide oqýlyqtarǵa qatysty feık sýretter jarıalaǵandarǵa qylmystyq is qozǵaldy. Bul týraly búgin Úkimet otyrysynan keıin BAQ ókilderiniń saýalyna jaýap bergen QR Bilim jáne ǵylym mınıstri Erlan Saǵadıev málim etti.

«Biz İshki ister mınıstrligine aryz berdik, olar óz jumystaryn bastady. Meniń túsinýimshe, qylmystyq is qozǵaldy. Olar ázirshe bizge esh aqparat bergen joq. Olarda jumys qaı deńgeıde ótip jatqanyn bilmeımiz. Bizdiń zańgerlik jumystarmen aınalysatyn departamentimiz qazaqstandyq oqýlyqtardaǵy dep sýretterdi jarıalaý faktisi boıynsha qylmystyq is qozǵaý týraly aryz berdi. Negizinde ol sýretter qazaqstandyq oqýlyqtarda joq. Biz mundaı aryz berýge mindetti boldyq. Eger de halyqty maqsatty túrde aldaý júrip jatsa, onda onymen İshki ister mınıstrligi aınalysýy tıis», - dedi Erlan Saǵadıev.

Sonymen qatar mınıstr «Oqýlyq» respýblıkalyq ǵylymı-tájirıbelik ortalyq ókilderi Qazaqstannyń barlyq óńirin aralap, atalǵan oqýlyqtardyń mazmunyna qatysty narazylyq tanytqan ata-analarmen jáne ustazdarmen kezdesýler ótkizedi. Kezdesý nátıjesinde usynystar men eskertýler jınalyp, Bilim jáne ǵylym mınıstrligi Parlamentte zańnamalyq deńgeıde otyrys ótkizedi.

«Zańnamalyq deńgeıde úlken kezdesý ótkizip, barlyq máselelerdi talqylaımyz. Sol jerde baspaǵa daıyndalyp jatqan oqýlyqtar da kórsetiledi. Sodan keıin baryp ortaq sheshimge kelemiz», - dedi ol.

---