InfoHub Logo

Búginde mektep muǵalimderi úshin 80 myń beınefılmder men ınteraktıvti sabaqtar bar. Olar kez kelgen materıaldy ǵalamtordan, ıa bolmasa, mektep serverinen alyp, sabaq kezinde paıdalana alady.

«Bıyl atalǵan sıfrlyq materıaldy 7 082 bilim berý uıymy, ıaǵnı barlyq mektepter paıdalanýǵa kiristi. Ony onlaın jáne offlaın rejımde alýǵa bolady. Bul degenimiz, beınematerıaldar mektep serverinde de saqtalady. Muǵalim ony kez kelgen ýaqytta alyp, sabaqty sapaly túrde berý úshin paıdalana alady. Sonda qosymsha materıal izdeýdiń qajet joq. Qazirgi kezde 440 muǵalim ortaq júıege qosyldy. Endi, biz kim, qansha, qandaı mektep pen sabaq boıynsha beınematerıaldardy paıdalanyp jatqanyn kóre alamyz», - dedi QR Bilim jáne ǵylym mınıstri Erlan Saǵadıev Úkimettiń búgingi otyrysynda.

Mınıstrdiń aıtýynsha, beınefılmder men ınteraktıvti sabaqtar júıesinde 200 myńǵa jýyq oqýshy da tirkeldi.

 «Árıne, ázirshe oqýshylardyń sany azdaý bolyp tur. Degenmen, olardyń úıge kelip, ol materıaldardy óz betimen kórip júrgeni qýantady. Bıyl mobıldi telefondar arqyly beınesabaqtardy kórý kórsetkishi 28 paıyzǵa kóterildi. Balalar matematıka, ınformatıka men aǵylshyn tiline arnalǵan ınteraktıvti sabaqtardy jıi kórip júredi», - dep atap kórsetti Erlan Kenjeǵalıuly.

---