Dúnıeniń dóńgelegi aınapady:
Kimi ústinde gýláıttap jaılanady;
Kimi astynda eziler saz balshyqtaı,
Bilmeımin, túbi nege aınalady?
«Ústegide ne qasıet, astaǵyda
Ne jazyq?» dep eriksiz oılanady.

— Ústegi syndyrmaǵan shóptiń basyn,
Sonda da tamaǵy toq, kıgeni asyl;
Jasaýly, zınnetteýli patatada
Qyzmetker daıar qylar kerek asyn.

On jyl qyzmet bir kedeı qylyp tappas
Qondyrǵan bir júzikke asyl tasyn;
Bir kedeı jyldyq tamaq eter edi,
Óndegen boıaýyna bet pen qasyn.
Beze nýge, oıynǵa mal shashýmen
Ótkizip bara jatyr ómir jasyn.

Qol joq onda jumysqa, iske tıer,
Juma saıyn bir modaly kıim kıer.
Sán-saýyqtyń bári de tabylady:
Tek qaısysyn kóńili onyń súıer.

Bir qonaǵy turady on myń teńge,
Nomerlerge barysy odan kem be?
Bir túngi bir áıelge shyqqan shyǵynyn
Tússe de kedeı tappas 40 jyl terge.

Joly bos jıhan kezse tamashalap,
Aldynda stol, bıshi qyz, qyzyl araq;
Portveın, karta oıyny kún-kún saıyn,
İsh pyskan soń otyra al maı tekke qarap.

Shalkasynan jatsa da, qudaı berer,
Shashsa da kedeılik joq oǵan kórer.
Zavody, fabrıgi, jer jalynan
Jyl saıyn mıllıon-mıllıon dohod keler.

Astaǵy jumys qylǵan qoly jaýryp,
Jasynan terge jýylyp, arqasy aýryp.
Jer astynyń kenderin shyǵaram dep,
Jóteledi, onda joq denge saýlyq.

---