InfoHub Logo

Qanshalyqty táýelsiz bolsaq ta, bárimiz ózgelerdiń pikirine qulaq asamyz. Oǵan kóp kóńil bólgen saıyn, ol bizdiń ómirimizge túbegeıli áser etýi múmkin. Adamzattyń tabıǵaty sol, biz elge súıkimdi, syıly bolǵymyz keledi. Biraq ol úshin árdaıym el ne deıdi eken dep jaltaqtaý durys pa? Eldiń ne oılaıtyny mańyzdy emes jáne munymen bas qatyrýdyń qajeti joq. Bul, árıne, oıyńa ne kelse sony isteý kerek degendi bildirmeıdi. Ózińizge mańyzdy degen adamdardyń pikirin tyńdańyz, saralańyz, tek sodan keıin ǵana ne isteý kerektigin sheshińiz. Sebebi týǵandaryńyz da qatelesýi múmkin ǵoı. Eger siz áli de ózgelerdiń qyspaǵy men pikirinen, sógisinen aryla almaı júrgen bolsańyz, onda sodan aryltýǵa kómektesetin oılaý júıesin qalyptastyraıyq.

Adamdardyń nazary árdaıym sizde dep oılaıtyn bolsańyz, qatelesesiz

Aınalańyzdaǵy adamdar kóbine óz isterine jáne óz sharýalaryna qam jeıdi. Olardy sizdiń ómirińizden buryn óz ómirleri tolǵandyrady. Eger sizdiń qyzyǵýshylyqtaryńyz ben kózqarastaryńyz qandaı da bir salada toǵysatyn bolsa, onda bul siz oılaǵandaı jıi emes. Ózińiz oılańyzshy, ózgelerdiń ne kıip kelgenine jıi nazar aýdarasyz ba? Jeıdesi kirlegen be? Shalbarynyń tizesi shyqqan ba? Siz bul týraly múlde oılamaısyz nemese bir-eki mınýttan kóp ýaqyt qurtpaıtynyńyzǵa senimdimin. Mine, ózgeler de dál solaı jasaıdy.

Bul sizdi tolǵandyrmaýy tıis

Ózgeler siz jaıly ne oılasa da – bul olardyń óz sharýasy. Bul sizge eshqalaı qatysty bolmaýy tıis. Bireýdiń siz jaıly pikirin estiseńiz de, bul sizdi basqa adam etpeıdi jáne kóp jaǵdaıda ómirińizdi ózgerte almaıdy. Ózgelerdiń pikirin ómirlik mańyzy bar pikir dep qabyldaǵan kezde ǵana olar sizge áser ete alady. Al buǵan jol berýge bolmaıdy. Siz ózgelerdiń pikirin qadaǵalaı almaısyz, sondyqtan oǵan nazar aýdarmaı, ózińizdi ǵana oılańyz.

Siz eshkimge uqsamaıtyn, erekshesiz

Osyny esińizde saqtańyz. Ózgelerdiń kózqarasyna ıkemdelmeńiz. Keńester úıin basyńyzǵa kirgizgen boıda ózińiz óz bolýdan qalasyz. Aınalańyzda adamdar kóp, al siz jalǵyzsyz. Bárine jaǵý qıyn. Elge jaltaqtamaı, óz qalaýyńyzsha ómir súrińiz jáne ondaı adam tek siz ǵana emes ekenin bilińiz. Dál sizdeı adamdy tabý qıyn. Óz ereksheligińizdi baǵalańyz. Ózińizdi syılańyz. Sonda ózgeler de sizdi syılaıtyn bolady.

Nege siz olardy áli de tyńdaısyz?

Eger bireý sizdiń pikirińizben kelispese nemese olardyń kóńilinen shyqpaıtyn áńgime aıtsańyz, ómirińiz qanshalyqty ózgeredi? Siz bárin durys emes istep jatyr degen saıyn ózgerýge daıynsyz ba? Olaı oılamaımyn. Kelesi joly bireýdiń pikirin kóńilińizge alyp qalsańyz, bul pikir bir aptadan keıin de siz úshin mańyzdy bola ma dep oılanyńyz. Eger sizge taǵylǵan eskertý sizdi bir saǵattan artyq mazalamasa, onda munyń bári bos ýaıym.

Siz telepat emes ekenińiz anyq

Eger sizdiń qandaı da bir balgerlik qasıetińiz bolmasa jáne sıqyrly shar sizge eshteńe kórsetpese, onda adamdardyń ne oılap júrgenin bilmeısiz. Eger siz qarapaıym adam bolsańyz, onda ózgelerdiń oıynda ne bolyp jatqanyn qaıdan bilesiz? Bar másele, aınalańyzdaǵy adamdardyń bar oıy tek sizde dep oılaıtynyńyzda. Bul egoıstikke jatady dep oılamaısyz ba? Eger ózgelerdiń ne oılap júrgenin bilmeıtin bolsańyz, onda olardyń pikiri jaıly bas qatyrmańyz.

Shynaıy bolyńyz jáne osy shaqta ómir súrińiz

Kúndelikti ózińizdi qalaı sezinesiz, bul tek sizge baılanysty. Qoǵam sizdiń isińizdi qoldamaıdy degen qorqynysh, ýaıymmen ómir súresiz be? Bul týraly oılaýdy doǵaryńyz. Burynyraqta bireý sizge eskertý jasaǵanynan nemese adamdar siz týraly jaman oılaıtyn boldy dep oılamańyz. Dál osy shaqta ómir súrińiz jáne jań-jaǵyńyzǵa jaltaqtamańyz. Keń tynystap, oılaryńyz ben isterińizge tek siz jaýapty ekenińizdi umytpańyz. Tek osylaı ǵana siz baqytty bola alasyz. Tek osylaı ǵana siz ár adamnyń óz pikiri bar ekenin uǵasyz jáne onyń sizge áser etý-etpeýin ózińiz qadaǵalaısyz.

Sizdi qoldaıtyn adamdarmen kóbirek aralasyńyz

Bári qoldaýdy qajet etedi. Týǵandaryńyz qarsy bolsa da, sizben kelisetin jáne kez kelgen bastamańyzǵa qoldaý bildiretin dostaryńyz bar bolsa tipti tamasha. Fızıkalyq jáne rýhanı densaýlyǵyńyzdy qoldaý úshin sizge tańdaý jasaý qajet: ózgelerdiń keńesi boıynsha armanyńyzdan bas tartý nemese óz jolyńyzdy tabýǵa shabyttandyratyn adamdarmen aralasý.

Ózgeler de qoǵamnyń pikirine alańdaıdy

Aınalańyzdaǵy adamdardy da ózgelerdiń pikiri alańdatady. Sondyqtan, kelesi joly bireý sizdi synaıtyn bolsa, ózińizdi sonyń ornyna qoıyp kórińiz. Bálkim, siz ol armandap júrgen, biraq jasaýǵa batyly jetpegen isti iske asyrǵan bolarsyz. Al endi ol sizdi artqa tartqysy keletin shyǵar? Osyny esińizde saqtańyz jáne sol kezde sizge syndy qabyldaý men ózgelerdiń is-áreketterinde ne astar jatqanyn uǵý ońaı bolady.

Ózińizben shynaıy bolyńyz. Aınalańyzda siz sıaqty adamdar júrgenin umytpańyz. Olardyń da óz máseleleri bar, olar da synǵa qalǵysy kelmeıdi, olar da minsiz emes. Eshqashan qatelespeıtin minsiz adam bolmaıdy. Jaı ǵana keıbir adamdar súrinip ketip, ómir boıy sol jerde toqtap qalady, al keıbiri qateliginen attap ótip, armanyna qadam basady. Qoǵamdyq pikir damýyńyzǵa kedergi bolmasyn jáne álemge bar qabiletińizdi kórsetińiz.

Al siz ózgelerdiń pikirine táýeldisiz be?

---