InfoHub Logo

(oıtolǵaq)

Shirkin, aýyldyń qystaýyn, jaz jaılaýyn aıtsaıshy. Qaladaǵy mashınalar men zaýyttardyń býdaqtaǵan tútine tunshyqqan aýasynan jýsan ıisi ańqyǵan aýylym artyq. Iá, men aýyldyń taza aýasyn,aǵarǵannyń daýasyn, syldyrap aqqan bulaǵyn, jaǵasynda jaıqalyp ósken quraǵyn, qyrynda qashqan qý túlkisin, ápkelerim men jeńgelerimniń kúmis kúlkisin, áke men aǵanyń qadir-qasıetin sezinip, bar jaqsylyǵyn boıyma jıyp óstim.

Áli esimde, apam qalaǵa baryp kelgen saıyn aıtatyn: «Júregim qysylyp keldim, aýasy basymdy aýyrtty», - dep. Al men bolsam túsinbeıtinmin. Nege? Nege ylǵı apam qalaǵa baryp, sharshap-shaldyǵyp keledi dep oılaýshy em. Birde sáti túsip meni apam qaladaǵy aǵamnyń úıine jiberdi. Qalaǵa baratyn avtobýsqa mingen sátten-aq bir túrli,aýylǵa degen qımas sezimim oıanǵandaı boldy. Qaladaǵy aǵamnyń úıine de jettim. Múldem  basqasha, tipti qala turǵyny men dala turǵynynyń arasynda úlken aıyrmashylyq bar eken. Aǵamnyń úıi bizdiń aýyldaǵy sıaqty jer úı emes, kóp qabatty úı. Úıinde shaǵyn ǵana óte kishkentaı túrli-tústi balyqtary bar akvarıýmdy, joǵaryda ilip qoıǵan temir torda shıqyldaǵan shymshyqty, ańqyǵan ıisteri ózgeshe úlken qumyradaǵy toltyrylyp salynǵan alýan gúlderdi kózim shaldy. Bizdiń aýyldaǵydaı ár kóshesinde óristen qaıtqan tórt túliktiń jamyraǵany emes, kóshe tolǵan túrli mashınalardyń gúrilin, sıgnalyn estısiń.

Birneshe kún qalada bolyp, aýylǵa asyǵyp keldim. Ózime bala kezimnen tanys qara topyraqqa tabanym tıgennen-aq aýyldyń men úshin tym ystyq ekenin tereń uqtym.

Mine, anaý meniń ózenim - óz erkimen balyqtary júzgen, mynaý meniń alma baǵym – qustary tamyljytyp ánimen áldılegen, meniń teretin gúlderim – qumyrada emes, qyr kilemindeı jaıqalǵan qyzǵaldyqtar, sarǵaldaqtar, áne, meniń jeńgelerim, qurbylarym ápkishterin ıyqtaryna ilip, bulaqqa qaraı júgirisken... Iá, qyz-kelinshekterdiń kúlkisimen jarysa syldar qaqqan móldir bulaǵym. Aldymda ırek-ırek sozylǵan meniń kóshem, jaǵalaı qonǵan záýlim terekterge ilingen japyraqtar sybdyrlap menimen sálemdesip, qushaǵyn ashyp turǵandaı. Sharbaq esikten kire bergennen kún nuryna shaǵylǵan apamnyń qolyndaǵy bilezikter jarqyly kózime tústi. Bul apam ǵoı, ádettegideı jez qumany qolynda, táı-táı basqan nemeresi jeteginde. Aýylǵa degen alyp-ushqan saǵynyshym tek tizesinde otyryp ataly sózin tyńdaǵanda, apamnyń qoıý kúreń sháıimen qosa shyjyq qosylǵan ystyq taba nanyn jegende ǵana basyldy. Áne-mine degenshe óristen jamyraı shýlasqan tórt túlik te kelip qaldy. Solarmen jarysa ádetinshe «aqsúıek» oınaýǵa shaqyryp qurdastarym keldi. Árıne, men de saǵynyp jetken qurbylarymmen qaýyshyp  qyrǵa qaraı  tarttym.

Iá, ózimdi dál sol sát eń baqytty jandaı sezindim. Sebebi, bar baılyq meniń dál kóz aldymda, men baǵa jetpes baılyq ortasynda qyzyqty, tátti balalyq shaǵymdy ótkizýde ekenmin.

«Men jigit – on bes-otyz arasynda,

Bul jasta kóp beresi-alasym da.

Aldymda tolǵan maqsat,tolǵan tańdaý –

Alaıyn mynasyn ba, anasyn ba?» - dep S.Toraıǵyrov aıtpaqshy, dál osy kezden bastap ary qaraı alyp ketetin úlken maqsat tańdaý jolyndamyn.

– Aýylym – dala ajary,

   Tek sende kóńil qalaýy.

   Ózińde ótken baldáýren

    Qol bulǵap áne barady, - dep, men búgingi tańda bıik arman bastaýyndamyn.

Kishkentaı aýyldan tartylǵan jol soraby meni úlken ómirge bastaıtyn birinshi soqpaǵym.

Bımyrzaeva Ásel Mahanbetqyzy,

OQO Túrkistan qalasy,

№17 Atatúrik atyndaǵy mektep-gımnazıasynyń muǵalimi.

---