InfoHub Logo

13 naýryzda Reseı prezıdenti Vladımır Pýtın Reseıdiń ıadrolyq soǵysty bastaýǵa tehnıkalyq daıyn ekenin aıtty. «Áskerı-tehnıkalyq turǵydan alǵanda, biz, árıne, daıynbyz. Olar (ıaǵnı, ıadrolyq kúshter) únemi jaýyngerlik ázirlik jaǵdaıynda», - dedi Pýtın telejúrgizýshi Dmıtrıı Kıselevke bergen suhbatynda.

Reseı Federasıasynyń basshysy atap ótkendeı, osy ýaqytqa deıin Ýkraınaǵa qarsy soǵysta taktıkalyq ıadrolyq qarýdy qoldanýdyń qajettiligi bolmaǵan. Kıselev Pýtınniń basyna nege mundaı oı kelmegenin surady. «Joq, nege?» dep jaýap berdi Reseı basshysy.

Pýtın eger Reseıdiń memlekettik shekarasyna, egemendigi men táýelsizdigine qaýip tónse, bul el ıadrolyq qarýdy qoldanýǵa májbúr bolatynyn atap ótti. «Bizdiń strategıamyzda bári jazylǵan, biz ony ózgertken joqpyz», - dep qosty Pýtın.

Pýtınniń aıtýynsha, reseılik ıadrolyq úshtik qazirgi ýaqytta álemdegi eń zamanaýı bolyp tabylady. Amerıka Qurama Shtattary da ıadrolyq áleýetin damytýda. Onyń ústine olar ıadrolyq synaqtar jasasa, Reseı de solaı jasaıdy.

«AQSH-tyń ıadrolyq synaqtaryn ótkizý múmkindigi jańa oqtumsyqtar paıda bolǵan kezde, keıbir sarapshylardyń pikirinshe, olardy tek kompúterde synaý jetkiliksiz, olardy tabıǵı túrde synaý qajet. Bul AQSH-taǵy belgili bir ortadaǵy ıdeıalar, olar qalqyp júr, olardyń orny bar. Biz bul týraly bilemiz. Biz de baqylap otyrmyz», - dedi Pýtın.

Biraq, bizdiń pikirinshe, Pýtın ıadrolyq qarýdy paıdalanýǵa barmaıdy. Soǵan birneshe sebepter bar.

Birinshi sebep – Pýtınniń syrtqy saıasatynyń negizi – bos bylshyl (blef). Siz uzaq ýaqyt «blef» jasaı alasyz, biraq, ýaqyt ótken saıyn olar sizge senýden qalady. Pýtın «reseıliktermen birge jumaqqa barýǵa» daıyn ekenin aıtty. Biraq, qazir ol óziniń osy sózin umytty. Ári ózi de jumaqqa umtylmaıtyny anyq.

Ekinshi sebep – Ýkraına joryǵy Reseı armıasynyń álsizdigi men osaldyǵyn kórsetti. Eki jyl astam ýaqyt ótti. Kremldiń áýeldegi josparynyń tas-talqany shyqty. Al ýkraındar birtindep Reseı qorǵanysyn zertteı bastady. Sátti qarsy shabýyldarǵa shyqty.

Úshinshi sebep – AQSH-tyń eskertýi. Pýtın ıadrolyq soǵys týraly aıta bastaǵannan keıin AQSH-tan eskertý aldy. AQSH baspasózi jazǵandaı, Pýtın taktıkalyq ıadrolyq qarý qoldanylǵan jaǵdaıda onyń Reseı aýmaǵyndaǵy barlyq býnkerleri joıylatynyn eskertildi. Al Reseı aýmaǵynda ondaı býnkerlerdiń onshaqtysy bar.

Tórtinshi sebep – Reseı armıasynyń kúsh-qýaty, jeńilmeıtindigi týraly kúni-túni aıtyldy. Biraq Ýkraınadaǵy soǵys bul doktrınaǵa kúmán keltirdi. Sonymen qatar, NATO áskerleriniń kúshi joıylǵan joq. «Álemniń ekinshi armıasy» dep atalatyndar NATO áskerimen kúsh synasqysy kelýi ekitalaı.

Osylaısha, Pýtınniń «qyzyl túımeni basýǵa» batyly barmaıdy. Pýtınniń ózin-ózi saqtaý ınstınkti jetkilikti damyǵandyqtan, onyń ıadrolyq máselede basqa elderdiń kúshin synaýy ekitalaı.