InfoHub Logo

Ál-Farabı atyndaǵy Qazaq ulttyq ýnıversıtetiniń Fılologıa jáne álem tilderi fakúltetinde 19-jeltoqsanda oqytýshy Aınur Ahmetova men «Stýdentterdiń ǵylymı qoǵamy» uıymynyń uıymdastyrýymen jas qalamger Torǵyn Joldasbekqyzymen onlaın kezdesý ótti. Sharaǵa fakúltet oqytýshylary men stýdentter jáne uıym músheleri qatysty.

Onlaın júzdesý barysynda qazirgi zamanǵy mádenı keńistiktegi kórkem ádebıettiń damýy, basty baǵyt-baǵdarlary men qalamger Torǵyn Joldasbekqyzynyń shyǵarmashylyq zerthanasy jaıynda keńirek aıtyldy. Kesh qonaǵy T.Joldasbekqyzy stýdentterge bolashaqta fılologıa salasy boıynsha qyzmet atqarýdyń joldaryn, mamandyq pen qazirgi zamana suranysyna saı qabiletterdi ıgerýge qatysty ózindik tájirıbesin sóz etti. Jazýshy jıynǵa qatysýshylardyń qazirgi ýaqyttaǵy kitap saýdasy, Qazaqstandaǵy jas avtorlardyń ádebıetti damytýdaǵy róli men óziniń shyǵarmashylyǵy týraly saýaldaryna jan-jaqty jaýap berdi. Jas qalamger stýdenttik kezdegi qyzyqty oqıǵalaryn aıtyp, qonaqtarǵa jarqyn kóńil-kúı syılady.

Kezdesý árbir stýdenttiń oı-órisin keńeıtip, izdeniske degen qulshynysyn arttyrǵany sózsiz. Qonaqtardyń saýaldaryna tyńǵylyqty, sabyrly keıippen jaýap bergen qalamgerdiń bolmysy qoǵamnyń kóptegen ókiline úlgi desek te bolǵandaı. Taǵdyrly jazýshynyń ómirlik ustanymy men ómirge degen kózqarasy ózgelerden erekshe. Qatysýshylar T.Joldasbekqyzynyń ǵıbratty áńgimeleri men júrekjardy sózderi oqyrman kóńilinen aıryqsha oryn aldy degen senimmen kezdesýdi aıaqtady.

Asel Psıbaeva, fılologıa jáne álem tilderi fakúltetiniń  3-kýrs stýdenti

---