InfoHub Logo

Qaraǵandyda jumbaq jaǵdaıda qaıtys bolǵan er adamnyń ólimine qatysty týystary kúdik keltirip otyr

Qaraǵandyda 40 jastaǵy Nurgeldi Naýkenovtiń jumbaq ólimine qatysty onyń týystary bul qastandyqpen jasalǵan áreket bolýy múmkin ekenin málimdedi. Marqum qalaǵa ulynyń oqý aqysy men páter aqysyn tóleý úshin kelgen. Alaıda, sol saparynan keıin úıine oralmaǵan.

Oqıǵa 1 mıllıon teńge alyp Qaraǵandyǵa kelgen Naýkenovtiń páter jaldap, sol kúni tanysymen birge dámhanaǵa barýynan bastalady. Kýágerlerdiń aıtýynsha, keshki as ústinde birneshe beıtanys adam qosylyp, belgisiz bireýi ony ıterip jibergen. Er adam aýyr soqqydan qulap, esinen tanyp qalǵan. Keıin ony es-tússiz kúıde taksıge otyrǵyzyp, jalǵa alynǵan páterdiń aldyna tastap ketken.

Týystarynyń sózinshe, Nurgeldi páterdi taba almaı, kóshede sendelip júrgende kórshiler polısıa shaqyrǵan. Alaıda tártip saqshylary aýyr jaraqaty bola tura jedel járdem shaqyrmaǵan. Qaıta úsh saǵat bólimshede ustap, keıin 16 jastaǵy ulyn shaqyrtyp, ákesin soǵan tapsyrǵan. Uly qonaqúıden bólme jaldap bergen. Nurgeldi sol jerde jalǵyz ózi kóz jumǵan.

Marqumnyń jaqyndary bul ólimniń kezdeısoq emestigin aıtyp otyr. Olardyń pikirinshe, bul – aldyn ala uıymdastyrylǵan shabýyl. Olar polısıanyń áreketine de kúmán keltirip, istiń ádil tergelýin talap etýde.

Qazir oqıǵa boıynsha tergeý bastalǵan. Al qoǵam belsendileri men quqyq qorǵaýshylar bul istiń jiti baqylaýǵa alynýyn surap otyr. Naýkenovtiń týystary bolsa, jaýaptylar jazasyz qalmaýy tıis deıdi.