InfoHub Logo

Kádiráliniń ustazy ataqty kúıshi Qazanǵap qasyna ergen shákirtterine tek kúı úıretip qana qoımaıdy, olardy basqa aýyldyń dombyrashylarymen tartysqa shyǵaryp, qandaı jaǵdaılarda qarsylasyn jeńýge bolatynyn aıtyp, únemi baýlyp otyrady. Bir jyly Kádiráli Qazanǵaptyń qasynda júrgende Tabyn rýynyń Tasybaı, Qonaqbaı sıaqty belgili dombyrashylarymen tartysyp olardy jeńedi. Kádiráliniń olardy jeńý sebepteri bylaı bolypty: Tasybaı men Qonaqbaı aýylyndaǵy jasy jetpister shamasyndaǵy bir baı tórt áıeldiń ústine besinshi etip, kórshi aýyldaǵy bir kedeıdiń jas qyzyn malǵa satyp alypty. Qyz baıdyń úıinde bir juma bolǵanda, elde qalǵan súıgen jigiti artynan izdep kelip, bir túnde alyp qashyp ketedi. Tún ortasynda baı jas «jubaıyn» izdep, shyrt uıqyda jatqan aýyldy bórliktirip oıatady.

Qyzdyń qashýyna kómektesken sol aýyldyń qý jigitteri baıdy mazaqtap, qyz ben jigit aýyldan uzaǵansha ony aldarqatyp aýyl mańyndaǵy qarabaraqtyń arasynan izdegen bolyp, «ana arada, myna arada» dep, tún ishinde qaraýytyp kóringen qarabaraqtyń arasyn baıǵa aralatyp, ábden silesin qatyrypty. Osy oqıǵany estigen Kádiráli Tasybaı, Qonaqbaı aýylynyń baılaryn mazaqtap, «Qasqa-aý, ana arada — qasqa-
aý, myna arada» dep kúı shyǵarǵanda, Tasybaı men Qonaqbaı: «Sarań baıdyń qyrsyǵy búkil elge, el namysyna tıdi», — dep, ózderiniń jeńilgendikterin moıyndapty. Sóıtip, Kádiráliniń «Qasqa-aý, ana arada — qasqa-aý, myna arada» degen kúıi, osy oqıǵaǵa baılanysty shyqqan eken.

 

---