InfoHub Logo

Múkeı men Jaıyr jortýylda júrip bir baıdyń qyz uzatý toıyna qatynasyp qalady. olar ózderiniń atyn-jónin qupıa saqtap, otaý úıinde bolyp jatqan jastardyń saýyǵyna kiredi.

Olar jastar arasynda bireýlerdiń Múkeıdiń «Telqońyr» kúıin buzyp shertip otyrǵanyn kóredi de, onyń dombyrasyn surap alyp, «bul kúı meniń bilýimde bylaı edi», — dep shertip beredi. Qurbylarynyń qalaýynsha kúıshi jalǵasty bir qaýym kúılerdi oryndaıdy. Qyza túsken dombyra saýyǵynyń bul salty úlkenderdiń de qulaǵyna shalynyp, toı ıesi olardy aýyl aqsaqaldary otyrǵan shańyraqqa shaqyrtyp kúı shertkizedi.

Top arasynda otyrǵan orta jastardan asqan bir taqys saýdager saýda istep júrip Múkeı aýyldaryna qonyp ketkeni esine túsip, Múkeıdi tanıdy da:

— Oı, inim, sen álgi jortýylshy, kúıshi Múkeı ekensiń ǵoı! Aýyl-aımaǵyń aman ba?—dep sýyryla amandasady. Múkeı sharasyzdan saýdagerdiń tanýyn moıyndaıdy. Toı ıesi Múkeıdi qurmettep qonaq etedi. Erteńinde attanar aldynda Múkeıge el aqsaqaldary aqyl aıtyp:

— Alashtyń ónerli azamaty ekensiń, munyńa jurt rıza. Atyńdy syrttaı estýshy edik, búgin kózimizben kórdik. Al jortyp júrip jylqy qýatyn óneriń de bar eken, munyńa janymyz qas. Eki aıaǵyńdy egiz baspa, aldyńǵy ónerińdi alǵa súıre, sońǵyńdy sý túbine tasta, — dep shapan kıgizip, aq tilekpen attandyrypty. Múkeı osydan soń el tilegin jón kórip, jortýylyn da qoıypty. Eline oralǵannan keıin «Qos basqan» kúıin jasapty.

---