InfoHub Logo

Orta júz Qoshqaruly Jánibek on úsh jasqa kelgende Uly júzde Qarabı degen aýzy dýaly, ózi bilimdi bı bar degen dańqyn estip, sodan baryp bata alýǵa jolǵa shyǵady. Ol qazaq pen qalmaqtyń jaýlasyp jatqan kezi bolsa kerek. Bulardyń barar jolyn qalmaqtar basyp alyp, olar óte almaı úıine qaıtyp kelip úsh jyl jatady.

Tórtinshi jylda jol ashylyp, Jánibek on alty jasynda Qarabıdiń eline keledi.

- Shyraǵym, kimniń ulysyń? – deıdi Qarabı.

- Qoshqaruly Jánibekpin, - dep jaýap beredi bala.

- Men seni osydan úsh jyl buryn kútip edim, nege keshiktiń?

Jánibek sebebin aıtady. Qarabı qonaqasyn berip erteńine:

- Ne qalaısyń, shyraǵym? – deıdi.

- Sizden bata alaıyn jáne ósıet bolarlyq óz aýzyńyzdan sóz estıin dep kelip edim, - deıdi Jánibek.

Sonda Qarabı batasyn berip bylaı degen eken:

Bederi joq qamqadan,

Berik toqylǵan bóz artyq.

Bereketi joq aǵaıynnan,

Berik sóılesken jat artyq.

Paıdany alystan qylǵaısyń,

Zalaldy jaqynnan qylǵaısyń.

Tyshqan da ininiń aınalasyna ottamaıdy,

Ony da esińe alǵaısyń.

Qaıtyp kirer esikti,

Qatty serpip jappaǵaısyń.

Qaıtyp kórer dosyńa.

Qaırylmastaı sóz aıtpaǵaısyń.

Osyny esińe ala júrseń, eshkimnen

Kem de, qor da bolmaısyń.

---