InfoHub Logo

2015 jyly «Saýat ashý» pánine ózgergen «Álippeni» 2019 jyly qaıta qalpyna keltiremiz. Onyń latynmen nemese kırıllısamen shyǵatynyn kelesi jyldyń basynda naqty sheshemiz. Biraq biz keıinge qaldyrmaımyz. Bul týraly QR Bilim jáne ǵylym mınıstri Erlan Saǵadıev «Habar» telearnasyna bergen suhbatynda aıtty.

Mınıstr telearnaǵa bergen suhbatynda bıylǵy oqý jylynda úlken ózgeristerdiń bolmaǵanyn aıtyp, tek 2, 5, 7-synyptardyń oqýlyqtary jańartylǵan mazmunmen sabaq bastaǵanyn jetkizdi.

«2019 jyldan bastap barlyq mektepke 0-synypty engizemiz. Oqýlyqtardyń jańartylǵan mazmunyna kezeń-kezeńmen kóshýdemiz. Byltyrǵy jyly jańa baǵdarlamany 1-synyp bastasa, bıyl 2, 5, 7-synyptar qosyldy. Jańa oqýlyqtar basylyp, bárine jiberildi. Kelesi jyly bul baǵdarlamaǵa 3, 6, 9-synyptar kóshedi. Bıyl 73 myń muǵalim jańartylǵan mazmun boıynsha deńgeıin kóterý kýrsynan ótti. Kelesi jyly taǵy 70 myń muǵalim bul kýrstan ótedi. Muǵalimderge qıynǵa soǵyp jatqan joq. Biz mektepterdi jańartylǵan mazmunǵa 2020 jyly tolyqtaı kóshiremiz», - degen mınıstr bıyl 1500-den astam muǵalim aǵylshyn tilin úırenip, aǵylshyn tilinde sabaq berýge kiriskenin aıtty.

Pánderdi aǵylshyn tilinde oqytý tek qalalarda ǵana bolmaıtynyn aıtqan mınıstr qazaqtyń balasy qaı jerde bolsa da biryńǵaı joǵary, sapaly, zamanaýı bilim alýy úshin bul baǵdarlama jappaı júzege asatynyn jetkizdi.

«Qazaqtyń balasy qaı jerde bolsa da biryńǵaı joǵary, sapaly, zamanaýı bilim alýy kerek. 2019 jyldan bastap 10, 11-synypta ınformatıka, fızıka, hımıa jáne bıologıa syndy 4 pán aǵylshyn tilinde oqytyla bastaıdy. Qazir 95 paıyz ata-ana balalaryna pánderdi aǵylshyn tilinde oqytýǵa daıyn», - dedi mınıstr.

2015 jyly «Saýat ashý» páni dep ózgergen «Álippe» áli kúnge ne úshin qaıta qalpyna keltirilmeı jatqanyn túsindirgen Erlan Kenjeǵalıuly jańa álippeniń latynmen daıyndalýy múmkin ekenin tilge tıek etti.

«Oqýlyqtardy ózgertýge 4 jyl saıyn qarjy bólinedi. Iaǵnı, 2015 jyly «Saýat ashý» dep ózgergen pán 2019 jyly qaıta «Álippe» degen ataýmen 0-synyptan bastap oqytylatyn bolady. Balalar «Álippeden» joǵarylap «Ana tilge» kóshedi. Al «Álippeniń» latyn men kırıllısanyń qaısysynda bolatynyn kelesi jyldyń basynda sheshemiz. Biraq biz sozbaımyz», - dedi Bilim jáne ǵylym mınıstri.

Mınıstr suhbatynda grant máselesine de toqtaldy. Onyń pikirinshe ár mamandyqqa bólingen granttardyń sany 3 jyl boıy ózgerissiz saqtalǵanda ǵana mektep bitirýshi bundaı tosyn jaǵdaıǵa tap bolmaıdy.

«Ár mamandyqqa ártúrli grant bólinedi. Mysaly, jalpy medısınaǵa 2000 grant bólinse, tis emdeýge 45 grant, pedagogıkaǵa 5000 grant berilse, ekonomıkaǵa 45 grant qana bólinedi. Sóıtip, ekonomıkany oqyǵysy kelgen bala 135 balmen túse almaı, pedagogıkaǵa 65 balmen ótip jatyr. Biz bul máseleni sheshemiz. Altyn belgilerdiń máselesin de depýtattarmen birge talqylap jatyrmyz. Menińshe ár mamandyqqa granttardyń sany 3 jyl buryn belgilenýi kerek. 3 jyl ózgerissiz qalsa balalar da aldyn ala boljap otyrady», - dedi Erlan Kenjeǵalıuly.

 

---