
- 31 jel. 2020 00:00
- 426
Qazaqstanda 1-5 synyp oqýshylarynyń sómkesi normatıvten 2,5 ese aýyr
Qazaqstanda 1-5 synyp oqýshylarynyń sómkesi normatıvten 2,5 ese aýyr. Bul jaıynda QR Densaýlyq saqtaý mınıstrliginde ótken jıynda aıtyldy.
Búgin QR Densaýlyq saqtaý vıse-mınıstri Ajar Ǵınıattyń tóraǵalyǵymen mektep medısınasynyń problemalyq máseleleri boıynsha onlaın-jumys konferensıasy ótti.
Jıynda ana men bala densaýlyǵyn qorǵaý departamenti Balalar men jasóspirimder densaýlyǵyn qorǵaý basqarmasynyń bastyǵy Janar Sadýova qazirgi jaǵdaı týraly baıandady.
Onyń aıtýynsha, oqý keshenderindegi gıgıenalyq normatıv pen tamaqtaný standarttarynyń saqtalýyna jasalǵan monıtorıń barysynda 1-5 synyp oqýshylarynda rúkzak salmaǵy boıynsha normatıvtiń 2-2,5 esege deıin asyp ketkeni anyqtaldy, al jeke shkaftarmen bar bolǵany 25,8% jabdyqtalǵan.
«Eger mekteptegi densaýlyq saqtaý júıesine jıyntyq taldaý júrgizsek, onda óndiristik prınsıp boıynsha saýyqtyrýdyń tómen ekeni baıqalady. Iaǵnı, turǵylyqty jeri men oqý orny arasynda aıyrmashylyq bolǵan kezde emhanalar arasyndaǵy sabaqtastyq, medısınalyq aqparattyq júıelerdi engizýdiń jetkiliksiz deńgeıi jáne mektepterdegi medısınalyq pýnktter kompúterler jetpegennen zardap shegýde», – dep atap ótti Janar Sadýova.
Medısınalyq kabınetterdi jabdyqtaý standarttaldy, BLS oqýmen jáne «mektep medısınasy» sıklymen qamtylǵan, mekteptegi medısına qyzmetkerleriniń sanattylyǵy artty, «mektep oqýshylarynyń tamaqtaný rasıony boıynsha biryńǵaı standarttar» ázirlendi jáne medısınalyq aqparattyq júıelerdi mekteptiń densaýlyq saqtaý júıesine kezeń-kezeńimen engizý.
«Mektep medısına qyzmetkerleriniń biliktiligin ýaqytyly arttyrýdy josparlaý, oqýshylardy profılaktıkalyq tekserý jaǵyn damytýǵa bolady. Sondaı-aq, menshik nysanyna qaramastan medısınalyq uıymdardy jasaqtaýdy, memlekettik medısınalyq uıymdardy «Mektep medısınasy» sertıfıkaty bar dárigerlermen qamtamasyz etý qajet», - dedi Sadýova.
İs-sharada Nur-Sultan qalasynyń mektep medısınasy úılestirýshisiniń jáne Medısınalyq saqtandyrý qorynyń taldaý jáne boljamdaý departamenti ókiliniń baıandamalary tyńdaldy.
Vıse-mınıstr A.Ǵınıat joǵaryda kórsetilgenderdi eskere otyryp, jergilikti densaýlyq saqtaý basqarmalaryna, qurylymdyq bólimsheler men mınıstrlikke qarasty medısınalyq uıymdarǵa problemalyq máselelerdi sheshý úshin tıisti tapsyrmalar berdi.