InfoHub Logo

Bizde geologıalyq barlaý salasy artta qalyp otyr, dedi «Atameken» QR UKP Tóralqa tóraǵasy Tımýr Qulybaev Taý-ken jáne metalýrgıa ónerkásibi komıtetiniń tóraǵasymen ótken jumys kezdesýi barysynda.

«Geologıalyq barlaý Qazaqstanda 20 myń adamdy biriktirgen kásibı ári básekege qabiletti sala bolǵany anyq. Qazir, árıne, tereń saraptama jasaý ádisteri, geologıalyq zertteýlerdi úlgileýdi qoldanatyn tehnologıalar damyp ketti. Bizde geologıalyq barlaý artta qalyp otyr. Bul - meni alańdatyp otyrǵan jaǵdaı. Óıtkeni, jumysty kim isteıdi? Taǵy sheteldik kompanıalardy shaqyramyz ba? Ókinishke qaraı, biz mamandarymyzdy joǵalttyq, tájirıbemiz azaıdy. Bárin qalpyna keltirýimiz kerek. Óıtkeni, geologıa - Qazaqstan úshin úlken bıznes», -  dedi Tımýr Qulybaev.

«Atameken» QR UKP Tóralqasynyń Taý-ken jáne metalýrgıa ónerkásibi komıtetiniń tóraǵasy Nıkolaı Radostoves energetıkalyq naryqta anyq strategıasyz ekonomıka salalaryn ary qaraı damytý múmkin emes ekenin aıtty.

«Ken ıgerý sektorynyń negizgi problemalary: salyq zańnamasyna ózgertýler engizý, temir jol tasymaly men gaz tasymaldaý qyzmetteri baǵasynyń ósýine áser etetin shyǵyndardy tómendetý, jańartylatyn energıa kózderi salasyndaǵy zańnamany jetildirý», - dedi ol.

«Atameken» UKP basshysy atap ótkendeı, tarıftiń qurylýy qosymsha qýattardyń qosylýyna, energotıimdilikti joǵarylatýǵa tikeleı baılanysty.

«Aldaǵy on jyldyqta salanyń qajettiligi men energoqýat kólemin anyqtaý qajet. Elimizde energotıimdilik máseleleri áli qolǵa alynǵan joq. Negizi, bul jerde úlken qor bar. Biz óndirisimizdiń elektroenergıany tutynýyn jáne energotıimdiligin jaqsartyp alamyz. Onyń arqasynda artyq qýat bolady»,  - dedi Tımýr Qulybaev.

---