InfoHub Logo

Qazaqstanda mektepter men ata-analar arasynda kelisim bekitý josparlanyp otyr. Bul týraly Májiliste Áleýmettik-mádenı damý komıtetiniń jáne «Nur Otan» partıasy fraksıasy janyndaǵy áleýmettik keńestiń birlesken otyrysynda QR BǴM vıse-mınıstri Asqat Aımaǵambetov málim etti.

«Pedagogtardy qorǵaý óte mańyzdy másele. Búginde biz Úkimet qaýlysyna ózgeris engizýdemiz, ıaǵnı bul bilim berý uıymdaryna qabyldaýdyń úlgilik erejesine qatysty. Osy úlgilik erejelerde «kelisimshart» degen jańa túsinikti engizýdemiz. Atap aıtqanda, bizde balabaqshalarda, ýnıversıtetterde kelisimsharttar bar. Alaıda osyndaı qujattar mektepterde, mektep pen ata-analar arasynda búginge deıin bolǵan emes. Sondyqtan bizdiń pedagogtardy qorǵaý maqsatynda, sondaı-aq ár taraptyń quqyǵy men mindettemelerin reglamentteý úshin mektepterde mindetti túrde kelisimsharttardy bekitýdi engizý týraly sheshim qabyldadyq. Bul turǵyda kim ne úshin jaýapty ekendigi aıqyndalady. Bizdińshe, bul qadam búginde baıqalǵan problemalarǵa óz áserin tıgizetin bolady», - dedi Aımaǵambetov.

Budan bólek ol mektepterdi qajetti jabdyqtarmen qamtý máselesine toqtala kele, ol úshin mınıstrlik maqsatty transfert bólip jatqanyn jetkizdi. Bul baǵytta kompterlermen jáne ózge de jabdyqtarmen qamtamasyz etý máselesi de eskerilgen. Jalpy, barlyq 7100 memlekettik mektep sıfrlyq bilim berý resýrstarymen qamtylǵan.

«Bizdiń oıymyzsha osy sharalar muǵalimderge eleýli qoldaý bolady. Sebebi bul quraldar men jabdyqtarda qajetti ádistemelik materıaldar qamtylǵan», - dedi vıse-mınıstr.

QazAqparat

---