InfoHub Logo

Qazaqstanda 737 myńnan astam múgedektigi bar adam turady. Erekshe qajettilikteri bar adamdardyń ómir sapasyn jaqsartý men áleýmettik qoldaý kórsetý – memleket saıasatynyń negizgi baǵyttarynyń biri sanalady. Bul salada Eńbek jáne halyqty áleýmettik qorǵaý mınıstrligi (EHÁQM) belsendi jumys júrgizýde.

Búgingi kúni múgedektigi bar adamdardyń ishinde 415,9 myńy eńbekke qabiletti jastaǵylar (56,4%), 206,8 myńy zeınet jasyndaǵy azamattar (28,0%), al 114,7 myńy – 18 jasqa deıingi balalar (15,6%) quraıdy.

Elimizde múgedektigi bar jandardy qoldaý úshin keshendi áleýmettik qorǵaý júıesi qalyptasqan. Bul júıe járdemaqylar, ońaltý sharalary men arnaıy áleýmettik qyzmetterdi qamtıdy. Memlekettik búdjet esebinen protezdik-ortopedıalyq kómek, tıflo-sýrdotehnıkalyq quraldar, kreslo-arbalar, sanatorıı-kýrorttyq em, jeke kómekshiler men ymdaý tili mamandarynyń qyzmetteri usynylady.

Memleket barlyq aımaqtarda múgedektigi bar adamdar úshin kedergisiz orta qurýdy júıeli túrde júzege asyryp jatyr. Sonymen birge, Eńbekmıniniń janynan qurylǵan úılestirý keńesi erekshe qajettilikteri bar azamattardyń máselelerin sheshý úshin jumys isteıdi.

2023 jylǵy 1 shildeden bastap Áleýmettik kodeks aıasynda múgedektigi bar azamattardy qoldaý sharalary aıtarlyqtaı keńeıtildi. 2024 jyly Qazaqstan BUU-nyń Múgedekterdiń quqyqtary týraly konvensıasyn júzege asyrý boıynsha alǵashqy ulttyq baıandamasyn sátti qorǵady. Komıtet elimizdiń qadamdaryn oń baǵalap, mańyzdy usynymdar berdi.

2024 jyldyń jeltoqsanynda Memleket basshysynyń tapsyrmasymen 2025–2030 jyldarǵa arnalǵan Inklúzıvti saıasat tujyrymdamasy qabyldandy. Ol erekshe qajettilikteri bar azamattardyń áleýmettik-ekonomıkalyq múmkindikterin keńeıtýge baǵyttalǵan.

Búgingi tańda 541,1 myń azamat múgedektigi boıynsha memlekettik áleýmettik járdemaqy alady. 2025 jyldyń qańtar-sáýir aılarynda bul maqsatqa 126 mlrd teńge bólindi. Ortasha járdemaqy kólemi 78 763 teńgeni qurady. Buǵan qosa, eńbekke qabilettiliginen aıyrylǵan azamattarǵa Memlekettik áleýmettik saqtandyrý qorynan qosymsha tólemder júrgiziledi.

Múgedektigi bar adamdar úshin 2020 jyldan beri jumys istep kele jatqan Áleýmettik qyzmetter portaly úlken jeńildik ákeldi. Jyl basynan beri portal arqyly 211,6 myńnan astam tapsyrys oryndaldy. Sonymen qatar, ónim men qyzmet sapasyn arttyrý úshin birqatar jańashyldyqtar engizildi.

Múgedektikti rásimdeý prosesiniń ashyqtyǵy men qoljetimdiligin arttyrý maqsatynda syrttaı proaktıvti medısınalyq-áleýmettik saraptama jobasy iske asyrylyp jatyr. 2025 jylǵy 1 sáýirge deıin 24,5 myńnan astam ótinim qaraldy.

Arnaýly áleýmettik qyzmetter de damyp keledi. 2025 jyldan bastap bul qyzmetter lısenzıalanatyn bolady. Búginde 500-den astam uıymǵa lısenzıa berildi, bul kórsetiletin qyzmet sapasyn arttyrýǵa septigin tıgizedi.