InfoHub Logo

Qazaqstannyń Memlekettik keńesshisi Erlan Qarın áleýmettik jelidegi paraqshasynda qoǵamda qyzý talqyǵa túsken memlekettik til máselesine qatysty pikir bildirdi.

«Kesheden beri áleýmettik jelilerde memlekettik tildiń mártebesine qatysty túrli pikirler aıtylyp, qyzý talqyǵa aınalǵanyn baıqap otyrmyz. Árkimniń oı bólisýi, kózqarasyn ashyq bildirýi — quptarlyq jaǵdaı. Degenmen, "bılik qazaq tiline qıanat jasady" deý – bos áńgime, daýryqpa sóz. Attanǵa salyp, aıǵaıǵa basyp, joq jerden daý shyǵaratyndaı esh negiz joq. Memlekettiń tilge qatysty ustanymy ózgermedi. Qazaq tilin elimizdegi etnosaralyq qatynas tiline aınaldyrý baǵytyndaǵy jumystar turaqty túrde jalǵasyp keledi», — dep jazdy Erlan Qarın.

Memlekettik keńesshi Assambleıa sesıasynda Memleket basshysynyń osy ustanymdy taǵy bir márte naqty jetkizgenin atap ótti. Sonymen qatar, qazaq tiliniń bolashaǵyna qatysty pesımısik kózqarastan arylatyn ýaqyt jetkenin aıtty.

«Kerisinshe, qazaq tiliniń qoǵamdaǵy orny jyl saıyn kúsheıip keledi. Eń bastysy — qazaq tili jastardyń tiline aınaldy. Búginde jas ǵalymdar, ónerpazdar, kásipkerler ana tilimizdi belsendi túrde qoldanyp, óz salalarynda damytýda. Sondyqtan "qazaq tiliniń bolashaǵy joq" deý esh qısynǵa kelmeıdi», — dedi Erlan Qarın.

Sonymen birge, ol memlekettik til mártebesin kóterý «ur da jyq» ádispen júzege aspaıtynyn, popýlızmge boı aldyrmaı, bul baǵytta júıeli ári naqty josparmen jumys isteý qajettigin basa aıtty.

«Qazaq tilin jeleý etip, saıası upaı jınaýǵa tyrysatyn áreketter naǵyz janashyrlyq emes. Qazirgi kúrdeli kezeńde mundaı uranshyldyq eldiń tynyshtyǵyna keri áser etýi múmkin», — dedi ol.

Erlan Qarın memlekettik tildiń mártebesin arttyrý — uzaq merzimdi, maqsatty jumysty qajet etetin mindet ekenin atap ótti.