InfoHub Logo

Ótken zamanda on segizge kelgen bir aqyn qyz aýyl-aımaq ishindegi bozbala, jigit-jeleńge óleńmen upaı salyp azar-aqyret berse kerek. Sodan qyzda esesi ketken el jigitteri alys jerdegi ataqty aqyn shaldy at-shapanyn berip qyzben aıtystyrmaq bolyp alyp keledi, qyz munan habarsyz bolady. Ekeýine arnaıy qyzoınaq isteıdi. Kópshilik jınalǵan soń, shal qyzǵa «aıtysalyq» dep óleń aıtady. Qyz: «Sizdi shal demeıin, aıtysaıyn, biraq ta bir jumbaǵym bar, sony jasyrýǵa ruqsat berińiz», – deıdi. Shal ruqsat beredi. Qyz: «5 kúshik, 10 ıt, 20 bóri, 30 arystan, 40 qabylan, 50 ógiz, 60 arqan, 70 tusaý, 80 shider, 90 torǵaı, 100 jumyrtqa», – depti. Shal:

         «Adamnyń jasy men kúsh-halin jasyryp otyrsyz», – dep sheshimin óleńmen qaıyrady; 5 jasta adamzat mysaly kúshik minezdi, 10-da ıtteı, 20-da bórideı, 30-da arystandaı bolady, 40-ta qabylandaı bolady. 50-de kúshi kóp momyn ógizdeı, 60-ta attaı arqandalady, 70-te onyń ústine tusaýlanady, 80-de arqan, tusaý ústine shider túsedi, 90-da torǵaıdaı hali bolady, 100-de shertip qalsań jarylatyn bir jumyrtqadaı qaýqary qalady», – dep sheshken eken. Qyz shaldan: «Óziń qaısysyń?» degende, shal jasym 65-te, arqandalǵanyma biraz bolyp edi, osy kúnde julqyna beremin, tusaý salyp qoıyńdarshy degendi estip júrmin», – depti.

         — Ata, buryn qyran bolsańyz da balaq baýlanyp tuǵyryńyzǵa otyrǵan ekensiz. Tulpar bolsańyz da arqandalǵan ekensiz. Arqannyń eń uzyny-jortýylshynyń arqany – 40 qulash, men qyzyl altaıymyn, siz alatyn 40 qulash jerdi baspaımyn, – depti qyz.

         Qyzdyń aqylyna, tapqyrlyǵyna rıza bolǵan shal qyzǵa batasyn beripti, qyz qolynan sýyryp altyn baldaǵymen qaltasynan alyp jibek oramalyn shalǵa tastapty.

---