InfoHub Logo

Seıpin degen han bolypty. Hannyń Múbárak deıtin ýáziri bolypty. Hannyń ýáziri hanǵa aıtypty:

         — Handa 40 kisiniń aqyly bar deıdi, egerde sizde 40 kisiniń aqyly bola turyp, daý bolsa, jańjal bolsa bizge nege joldaısyz, óz betińizben nege bitirip jibermeısiz? Bizben nege aqyldasasyz? – depti. Sonda han aıtypty:

         — Handa 40 kisiniń aqyly bar ekendigi ras. Biraq bir jerde Samyr degen shal bar, sol shalda 40 hannyń aqyly bar. Sol shaldy munda qonaqqa shaqyryp kel, –  depti han ýázirge. Múbárak Samyr shaldy qonaqqa shaqyryp ákelipti.

         Han shaldyń tamaǵyn berip syılap otyrady. Ýázir otyryp: «Bul jaman shaldyń qandaı qasıeti bar, mynaý jeti rýdy bılegen han, al anaý shal – kedeı», – dep ishinen oılap otyrypty. Han shalǵa aıtady: «Men sizge tańerteń bir qus jiberemin, sol qusymnyń eki jaq qanatyn julyp, tazalap jibergeısiz», – depti. Ýázir ne degen sóz ekendigine túsinbeı qalypty. Shal hanǵa aıtypty: «Han, men beske birdi qosyp altaý qylyp tańerteńnen keshke sheıin altyn soqqanda otyz ekige jetkize almaı júrmin-aý!» – depti. Ýázir taǵy ne degen sóz ekendigine túsinbeı qalady. Shal ketedi. Úsh kúnnen soń han ýázirine: «Shalǵa qonaqqa baryp kel», – depti. Ýázir kelse jaman úıi bar, ústi-basy kúıe-kúıe shal baryn beredi, keńesip otyrady. Samyr shalǵa ýázir aıtady: «Sizge meniń bir suraýym bar», – deıdi. Shal «surańyz» deıdi.

         — Keshe sizge han: «Tańerteń bir qus jiberem, sol qusymnyń eki jaq qanatyn julyp tazalap jiber», – dep edi, sol ne sóz?» – deıdi. Shaldyń sózi: «Balam, men kedeı adammyn ǵoı, sonymen kún kórip otyraıyn, bir qalta altyn berseń, sheship beremin ǵoı!» – depti. Ýázir bir qalta altyn beripti. Ýázir «Taǵy bir suraýym bar» depti. Shal: «Sura, balam»,  depti. «Siz keshe hanǵa beske birdi qosyp altaý qylyp tańerteńnen keshke sheıin altyn soqqanda otyz ekige jetkize almaı júrmin-aý» degen sózińizge túsinbeı qaldym-aý», – depti. Shal: «Balam, men kedeı adammyn ǵoı, aqylymmen kún kórip otyrǵan, bir qalta altyn berseń, sheship beremin ǵoı!», – depti. Taǵy bir qalta altyn beripti. Sonda 40 hannyń aqyly bar degen shaldyń sheshkeni: «Balam, osy saýsaǵym nesheý?» depti. Beseý ǵoı! Soǵan birdi qosshy, nesheý bolady?»

         — Alty bolady.

         — Endeshe, tańerteńnen keshke sheıin jumys istegende tapqan-taıanǵanym iship-jeýime jetpeıdi degen sózim edi. Al hannyń «Tańerteń bir qus jiberemin, sol qusymnyń eki jaq qanatyn julyp tazalap jiber» degeni ol mynaý: — qus sen, eki qaltańdy tazalap sypyrdym ba? Endi júre ber, – depti shal hannyń ýázirine. Sonda baryp ýázir shalda 40 hannyń aqyly bar ekendigine sengen eken.

---