InfoHub Logo

Túrkeshtiń tusynda Joldybaı degen kedeı bolypty. Joldybaıdyń mal degende, mańdaıyna bitken jalǵyz qońyr ala aty bar eken. Ol shapsa, aldyna qara salmaıtyn júırik bolsa kerek. Talaı at shabys báıgisiniń júldesin jeńip alypty. Buǵan ishteri kúıgen baılar men bıler, qalaı da osy atty ózderiniń qoldaryna túsirýge, tipti bolmaǵan kúnde Qońyr alanyń kózin qurtýǵa tyrysady. Joldybaıdan qolqa salyp Qońyr alany suraıdy. Biraq Joldybaı oǵan kónbeıdi. Aqyry bolmaıtynyn bilgen soń, bı óziniń shabarmandaryna:

— Qońyr alany ustap alyp kelińder! — dep buıyrady. Shabarmandar jaıylysta júrgen Qońyr alany jan-jaqtan qorshap ustamaqshy bolady. Bul kelgenderdiń bóten adamdar ekenin sezgen Qońyr ala qorshaýdyń bir shetinen buzyp ótip, aýylǵa qaraı qashady...

Qýǵanmen ustatpaıtynyn sezgen shabarmandar Qońyr alany atyp mertiktiredi. Janýar jaraly janyn qınaı-qınaı qýǵynshylardyń qolyna túspeı, úıine jetedi. Atynyń aıanyshty halin kórgen Joldybaı mańdaıyna bitken qımas jalǵyz atynyń mert bolǵanyna qatty qaıǵyrady. Ózine qastandyq oılaǵan bılerge laǵynet aıtady.

Joldybaıdyń osy jaǵdaıyn kórgen Túrkesh «Qapyda ketken qaıran, qońyrym-aı» dep, «Qońyr ala» atty kúı shyǵarady.

---