InfoHub Logo

Kúı qýalap, izdenip júrgen jas Áshim, bir jyly Kókqamyr baýraıyn aralaı kelip Qaıshy, Shirke jaılaýynda bolady. Barǵan jegjatynyń Áshimmen shamalas bir uly bar eken. Ekeýi keshqurym saýyndaǵy bıeni óristetip jiberip, keshki aıtys óleńge baryp, tańǵa jaqyn qaıtady da, óristegi jylqynyń mańyna, bulaq boıyndaǵy bitik boztal arasyna kelip kóz shyrymyn alady. Tań raýandap kele jatqanda Áshim oıana ketedi. Tal arasynan bir bulbuldyń saırap turǵan úni qulaǵyna shalynady. Áshim san áýendi bulbul únine qatty qyzyǵyp uıyp tyńdaıdy. Bulbul úni toqtaǵan kezde Áshim dombyrasyn qolyna ala salyp, ásem saz shyǵaryp, bulbulǵa dybys beredi de, qaıtadan toqtata qoıady. Bulbul qaıta saıraı jóneledi. Bul tusta Áshim dombyra únin kóterip ásem kúıge basady. Muny estigen bulbul saıraýyn toqtata qoıady. Jaılaýdyń jaıly tańy, tabıǵattyń erke, sheshen qusy men óner qýǵan jas dombyrashy Áshim ári óner jarysynda otyrǵandaı ári tátti áýenmen syrlas qandaı bolady.

— Men bul iske qatty tańyrqadym, — deýshi edi Áshim, osy jaıly sóılegende, — bulbuldyń saıraǵanyna nazar aýdarǵanym da sol eken. Bulbul ushyp jaqyndap keledi de, taǵy saıraıdy. Bulbuldyń ásem ánine berilgendigimnen qasymdaǵy jigitti de oıatpappyn, kún qyza kele bulbul ǵaıyp boldy, qalyń boztal ishinen onyń boıyn da kóre almadym. Tabıǵattyń osy bir erkesimen «syrlasyp» otyryp, bıeni de kesh jıyp qaıttyq. Adam sezimine osyndaı erekshe yqpal jasalmasa, shabyt qaıdan kelsin! Men «Tań bulbuly» degen kúıdi osylaı shyǵardym.

 

---