InfoHub Logo

Saýyr taýynyń teriskeıindegi belgili bireý Qupqysary aýdanyndaǵy muńǵuldardan bir at urlap ákeledi. Muńǵuldar izge túsip, Qoshtaı qońsy otyrǵan aýyldan kúmándanady. Jáne «urlaǵan atty qaıtaryp berseńder» dep qysym jasaıdy. Aýyl aqsaqaldary muńǵuldyń shynýańynan qorqyp at urlap ákelgendigin moıyndaıdy da, páleni eki úıli kirmege jabady. Urlap ákelingen attyń kózi joq bolǵandyqtan, attyń quny úshin bir jaqsy atan túıe berýge eki úı kirmeni zorlaıdy. Osy aýyldaǵy baıdyń jylqyshysy Qoshtaıdyń naqaq kúıgeli otyrǵan eki otbasyna qabyrǵasy qatty qaıysady. Aýyldyń bilekti adamdaryna:

— Bul qý súıekterdi qansha qysqandaryńmen maı shyǵa ma? Attyń quny úshin meniń jalǵyz atanymdy berińder, — deıdi. Muńǵuldardyń qysymynan tez qutylýǵa asyqqan aýyl aqsaqaldary:

— Eki úı kirmemen qalaı bitisesiń? — deıdi Qoshtaıǵa.

— Ózderi bilip berse qolynan, bermese jolynan alamyn, — deıdi Qoshtaı jymıyp.

Áýel biliktileri bul sózdiń mánisin túsinbese de, daýdan tez qutylǵandaryna qýanyp, Qoshtaıdyń jalǵyz atanyn muńǵuldarǵa jetektetip qoıa beredi.

Muńǵuldar ketisimen Qoshtaı túıesin alyp qalýdyń qamyna kirisedi. Ol tústik jerdegi Qaraǵaıty degen ıen saıda joldyń bir qaltarys jerinde jalańashtanyp, batpaqqa aýnap alyp, muńǵuldardy tosyp jatady. Álden ýaqytta túıeni jetektegen eki muńǵul saıdy órlep, Qoshtaıdyń jasyrynyp jatqan jeriniń qasynan óte beredi. Qoshtaı eki muńǵuldyń sońynan qýyp jetip, túıeniń buıdasyn túbinen kesedi de,
buıdany ózi tistep, erip otyrady. Biraz júrgen soń Qoshtaı bet-aýzyn tyrjyıtyp, shabyna tartyp tura qalady. Artyna qaraǵan muńǵuldar myna sumdyqty kórip, «baǵlap, baǵlap» (Baǵlap — muńǵul tilinde «oıbaı», «qudaı» degen maǵynada.) dep buıdany tastaı sap qasha jóneledi. Qoshtaı aty men qıimin tastaǵan jerge kelip, jýynyp-shaıynady da, túıesin jetektep aýylyna qaıtady.

Keıin Qoshtaıdyń túıesiniń aýylda júrgenin kórgen aýyl adamdary Qoshtaıǵa:

— Túıe jershil mal ǵoı, janýar qashyp kelgen eken, — deıdi.

Sonda Qoshtaı:

— Iá, meniń jalǵyz atanym berekeli boldy ǵoı, senderdi de, naqaq kúıgen eki úıdi de, muńǵuldy da, ózimdi de qaryq qyldy, — dep júre beripti. Bul syrdy el keıin bilgen eken.

---