InfoHub Logo

Eki ótirikshi biri bastap, biri qostap el aralap, ótirik aıtpaqshy bolypty. Bireýi bir kún ilgeri júrip, el aralap, qonǵan, tústengen jerine, jolyqqan adamyna ótirik aıta bermekshi bolypty. Ekinshisi bir kún keıin júrip, sol jónmen aldyńǵy ótirikshiniń aıtqanyn qostap, rastap otyrmaqshy bolypty.

Ótirikti bastaýshy bir aýylǵa kelip qonypty. Aýyl adamdary:

— Jarqynym, jaqsy-jamannan ne til bar? – dese, ótirikshi:

— El aman, jurt tynysh, jalǵyz-aq kókti kóbeleı, aspandy aralaı kóship bara jatqan el kórdim, – depti. El nanbapty.

Endi kelesi keshke sol aýylǵa qostaýshy ótirikshi kelip qonypty. Aýyl adamdary taǵy da:

— Jarqynym, jaqsy-jamannan ne til bar, keshe kelip, bir qonaq kókti kóbeleı, aspandy aralaı el kóship bara jatyr eken dedi, onan ne bilesiń? – deıdi.

Qostaýshy:

— Bolsa bolar, óıtkeni aspannan anda-sanda keregeniń saǵanaǵy túsip bara jatqanyn kórdim, –depti. Bul ótirik sonan keıin elge laqap bolyp taralyp ketipti.

Kelesi kúni ótirikti bastaýshy endi bir qonalqadaǵy elge kelgende aýyl adamdary kórgen-bilgeniń bolsa aıta otyr, shyraǵym, degende:

— Bóten aıtarlyq sóz joq. Jalǵyz-aq jolda bir úlken kól órtenip jatyr eken, – depti. El nanbapty.

Kelesi keshke sol aýylǵa qostaýshy ótirikshi kelip qonypty. Aýyl adamdary odan: «Jarqynym, jańǵyryqqan ne til bar? Keshe bir jolaýshy, jolda bir kól órtenip jatyr eken dep ketti, onan ne bilesiń?» – dep suraǵanda qostaýshy:

— Bolsa bolar, óıtkeni sol kólden basy kúıik, denesi kúıik balyqtardy árkim alyp bara jatqanyn kórgenim ras, – depti. Bul ótirik sonan keıin elge tarap ketipti.

---