InfoHub Logo

Kanadalyq D-Wave kompanıasy – komersıalyq qoljetimdi kvanttyq kompúterlerin shyǵarý salasyn alǵash qolǵa alǵan kompanıa. Kvanttyq kompúterlerdiń alǵashqy úlgisi 2007 jyly shyqqan. Ol – 16 kýbıtti jáne 28 kýbıtti Orion kompúteri edi. 2011 jyldyń mamyr aıynda 128 bıtti chıpi bar D-Wave One, munan soń 512 kýbıtti chıpi bar D-Wave Two úlgileri satylymǵa shyqty. D-Wave kompanıasy kvanttyq kompúter óndirisin munymen toqtatpaq emes edi. Araǵa ýaqyt sala quny 15 000 000 AQSH dollaryn quraıtyn prosesory 2 000 kýbıtti D-Wave 2000Q kompúteri satylymǵa shyǵaryldy.

«Mundaı kompúterdiń qajeti ne?» nemese «Kvanttyq kompúter suranysqa ıe bola almaıdy» dep oılasańyz, qateleskenińiz. Kompúterdiń jańa úlgisin ıemdengisi kelgen satyp alýshylar kezekke turýda. Árıne, kóptegen bedeldi ǵalymdardyń pikirinshe, munshalyq qymbat tehnıkany satyp alý – aqylǵa qonymsyz. Deı turǵanmen, jańa kompúterdi alǵash ıelenýshi kompúterlik qaýipsizdikpen aınalysatyn Temporal Defence Systems kompanıasy bolmaq. Kvanttyq kompúterlerdiń qaýipsizdik boıynsha mamandarǵa ushyrasatyn keshendi máselelerdi shuǵyl túrde sheshýge múmkindik beretinine kompanıa basshylyǵynyń senimi zor. Sonymen qatar ózge ǵalamsharlardy zertteýge arnalǵan roverlerdi jasap shyǵaratyn ǵalymdar da kvanttyq kompúterge qyzyǵýshylyq tanytqan.

Kvanttyq kompúter men bizdiń qoldanysymyzdaǵy dástúrli kompúterlerdiń aıyrmashylyǵyn salystyrý – ońaıdyń isi emes. Esepteý turǵysynan alǵanda kvanttyq kompúterdiń basymdyǵy mol bolǵanymen, utylatyn tustary da joq emes D-Wave 2000Q óndirýshileri kompúterdiń jańa úlgisiniń mashınalyq oqytýdaǵy artyqshylyqtary mol ekendigin alǵa tartady. Dese de kvanttyq kompúterde jumys isteý úshin, baǵdarlamalyq jasaqtamany tolyqtaı beıimdeý kerek. Al ol mamandardan biraz ýaqyt pen kúshti talap etedi. Ne de bolsa, D-Wave kompanıasy jańa úlgilerdi oılap tabý jumystaryn toqtatpaq emes. Sondyqtan aldaǵy kúnderi kvanttyq kompúterdiń anaǵurlym kúshtirek úlgilerimen tanysatynymyz anyq. Al quny aspandap turǵan kvanttyq tehnıkanyń bizge qajeti bar ma? Sizdiń pikirińiz qandaı?

---