InfoHub Logo

Baıaǵyda elge syıly, bilikti qart ustaz ǵumyr keshipti. Erekshe iltıpatqa bólengen tálimgerge bar aımaqtyń turǵyndary kelip, aqyl surap, keńesterin tyńdap, rýhanı lázzat alyp qaıtady eken. Bir kúni qart ustaz dorbasyn asynyp, aýyl-aımaqty sharlap, aqyl-keńes berýge jınalypty. Ómirlik sabaq berýdi maqsat tutqan tálimger- shákirtterin de janyna alyp, biraz synap kórýdi jón dep taýypty. Shákirtteri de ustazynyń usynysyna dán rıza edi.

Osylaı jeti kún de óte shyǵady. Jol boıy taryny ǵana talǵajaý etken shákirtteri aryp-ashyp, kóńilderi qulazyp kele jatady. Al, ǵulama bárin baıqap, ilim-ǵylymǵa baýlýdy jalǵastyryp, kóńilin aýdarmaı júrip keledi. Arada sút pisirimdeı ýaqyt ótken soń ǵulamanyń shydamsyzdaý shákirti sóz bastaıdy:

— Ustaz, biz sharshadyq. Adamdarǵa aqyl-keńes bergińiz keledi eken. Biraq, oǵan bizdiń ne qatysymyz bar? Osy jerde súıegim qalsyn demeseńiz, bir jutym sý berińizshi,-depti.

Ǵulama shákirtine kóz tastap, áńgimesin qaıta jalǵapty. Bir sátte álgi shákirt:

— Ustaz, meniń shydamym taýsyldy,-dep álgi shákirti jerge otyra ketti. Ǵulamanyń basqa shákirtteri joldastarynyń bul qylyǵyna ań-tań bolyp, ashyqqanyn da umytyp, sabyrǵa shaqyra bastady. Qart ustaz uzaq oılanyp, shákirtine túbi tesik shólmek usynyp:

— Mynany al da, bizge bulaqtan sý ákilep ber,-deıdi. Shákirti ashýǵa minip:

— Siz meni mazaq qylyp tursyz ba?! Álde bul qyljaq pa? Men qalaı túbi tesik shólmekpen sý ákelmekpin?!

— Mine, kórdiń be,  ár istiń baıybyna bara almaıtyn adamdardyń shydamsyzdyǵy nege ákelip soǵaryn?! Ol da osy túbi tesik shólmek sekildi, aıtqan aqylyńdy qulaǵyna ilip jatpaıdy. Eshkimge de, eshteńege de paıdasy joq. Sabyrsyzdyq-kúlli dúnıeniń dushpany,-dep sózin túıindepti.

Arýjan Samıdın

---