InfoHub Logo

Ózime de obal joq. Sháınekti sekseýildiń shoǵyna qoıyp nem bar edi. Bul úıde shań shuń urystyń bastalary anyq. Ony ishim sezedi. Apam qyrman basynda. Soǵystyń jan alyp, jan beris shaǵy ǵoı. Aǵaıym Áset malatasqa minedi. Boıy menen sál qalqyńqy, ap-aryq. Jasy on úshte. Eki jas úlken. Apamnyń ámiri boıynsha onyń esimin ataýǵa qaqymyz joq. «Aǵa» deımiz.

— Erkek atanǵanynnan aınaldym. Osy úıdiń basy-kózi osy. Tútin túteter jalǵyzy, — dep apam Ásettiń mereıin kóterip otyrǵany.

— Biz she? — deımin apammen qarsylasyp. Bizi — Nasıha, Ásıa jáne men.

— Táıt ary. Erkektiń aty erkek. Keshegi jaý jaǵadan alyp, eldi shapqanda qolyna qarý alyp, qarsy turǵan da osylar. Áne, maıdanǵa da solar ketti, — deıdi apam meni tıyp tastap. Apamnyń kórshidegi Ospan degen balany jolyn kespeı ótkizip jiberip, sonan keıin qozǵalatyny sondyqtan shyǵar. Úsh qyzdyń — myna bizdiń qarsylyǵymyz apam úshin túkke turmaıdy. Birdi aıtyp, birge kete berippin ǵoı. Apam túski shaıǵa úıge oralarda, sháýgimdi bojyldata qaınatyp, sháınekke shaı shyǵaratyn ádetim. Kórshiniń úıinen ákelgen sekseýldiń shoǵynyń qyrsyǵy. Sharshap kelgen apamnyń qaımaq qatqan kúreń shaıdy jaıǵasyp otyryp silteıtini bar. Dastarhan jaıyp, oshaq basyna qaıta oraldym. Sháınektiń qaqpaǵyn ashyp jibersem. O, sumdyq! Sháınektiń ishi bos. Munysy nesi? Túbinde qoıý bop battasqan sama ǵana. Sháınekti kótere berdim. Masqara. Ustaramen keskendeı túbi aınalyp tússin de qalsyn. Zárem ushty. Apamnyń:

— Arýaǵynnan aınalaıyn, enemniń kózi ǵoı. Bul sháınekti atam Anton-SHerkesten ákep bergen. Syıly adamdar kelgende ǵana ustalatyn, — dep otyratyny esime tústi. Ne isterimdi bilmeı sastym.

Ýaqytqa berik apam da kep jetti. Jasaýly dastarhannyń janyna kep, belbeýin sheship jaıǵasyp otyra ketti.

— Áý úrpıisip otyrǵandaryń ne? — dedi ol burysh-buryshta jaıǵasqan bizge qarap. — Jaıshylyq pa? Bizde ún joq. Apam sasaıyn dedi.

— Shaı ákelmeısińder me? Sharshap ta, shóldep te kettim. Ornymyzdan qozǵala qoımadyq. Apamnyń qoıý qabaǵy túskıip, júzi surǵylt tartty.

— Kózderiń isip tur ǵoı. Jylaǵansyndar ma? — dedi ol. Basymdy shaıqadym.

— Maıdannan hat keldi me? — Joq.

— Týh, — dedi apam endi jaıdarylanyp. — Qatty qorqyttyndar ǵoı, túge. Birdemeni búldirgensinder-aý, á. Apam jyly jymıdy. Apamnyń minezi birde bult, birde ashyq aspan.

— Áý, nege úndemeısińder, túge, — dedi apam. Endi bir sát zorlana kúlip.

— El ishi tynysh, beısaýat habar joq. Úı ornynda, tamaq toq, kıim bútin. Qudaıǵa endi ne jazyp ek. Qandy soǵysty búkil el bop bastan ótkerip otyrmyz. Jeńip jatyrmyz.

— Al, apa uryspaısyz ba? — dedim.

— E, nege? — Qatyn ashýlansa qazan qaınatar, — dedi apam.

— Ýáde ǵoı.

— Eı, mynaý ne dep otyr-eı. Men qashan aıtqanymnan taıyp edim, — dedi apam. Batylym jeter emes.

— Sydyqbek muǵalimderiń ekilikti qonjıtqan-aý, — dedi apam kózin syǵyraıtyn.

— Joq, búgin Ásıa da, Násıha da bes aldy.

— Jaradyndar, jigitter, — dedi apam kóńildenip.

— Áı, qyzdar álgi aǵaılaryń ógizden jyǵylyp (Ásetti meńzep otyrǵany)...

— Qudaı saqtasyn.

— Áý, adam óltirsender de aıtsańdarshy, tegi.

— Ana sháınektiń túbi aınalyp túsip qaldy, — dedim basymdy báıgige tigip. Endigi sátti kútip, tym-tyrys qaldyq.

— Ózimiz de tańbyz, — dedi Násıha.

— Sháı shyǵaraıyn desem, ishinde sý joq, — dedi Ásıa. Apam kekjıe qarady. Endi bir sátte kózinen ashý oty jarq etip, soıqan bastalar dep kúttik.

— Týh, sonshama záremdi ushyratyndaı ne jazyp em, senderge. Bul dúnıede máńgilikke qalatyndaı ne bar. Adam da óledi, kól de qurǵaıdy, taý da mújiledi. Enemnen qalǵan kóz edi. Ýaqyt keldi. Syndy. Solaı emes pe, qyzdar, — dedi apam sambyrlaı sóılep. Biraq apam sháınekti kúresinge laqtyryp jibergen joq. Ekidi men aqshamnyń ortasynda kórshidegi Baıjaılaý ustanyń úıine baryp mys sym temirmen qursaýlatyp alyp keldi:

— Ásettiń áıeline beremin, — deıdi kádimgideı kúrsinip. Sonan soń abdyra sandyqtyń aýzyn asha bastady.

---