InfoHub Logo

Endigi ýaqytta sandyq bilim berý resýrstaryn ázirleýge memleket qarjysy jumsalmaıdy. Bul týraly búgin QR Bilim jáne ǵylym mınıstrliginiń keńeıtilgen alqa májilisinde vedomstvo basshysy Erlan Saǵadıev málim etti.

«Atyshýly E-learning taǵdyry jaıynda aıta ketý mańyzdy bolyp tur. Óıtkeni, bul áńgimelerdi tıatyn ýaqyt jetti. Shynymen de 30 mlrd teńge jumsaldy. Biz barlyǵyn saraptadyq. Onyń ishinde qural-jabdyqtarǵa 27 mlrd teńge jumsaldy. Olar: serverler, ınteratıkti taqtalar, kompúterler, baılanys, mektepterdegi ınternet jáne lısenzıalanǵan baǵdarlamalar. Búgingi kúni munyń barlyǵy jumys istep tur, eskirip te bara jatyr. Biz olardyń tehnıkalyq turǵyda eskiretindigin bilemiz, biraq jumys istep tur», - dedi Erlan Saǵadıev.

Onyń aıtýynsha, 2 mlrd teńge Ulttyq málimetterdiń bilim berý bazasy men Oqytýdy basqarý júıesine jumsalǵan.  Al qalǵan 1 mlrd teńge sandyq bilim berý resýstaryna, vıdeo dárister men ınteraktıvti sabaqtarǵa ketken.

Sonymen qatar mınıstr aldaǵy ýaqytta sandyq bilim berý resýrstaryn ázirleýge memleket qarjysyn jumsaýdyń esh reti joq ekendigin basa aıtty. «Naryqta barlyq elderdiń sandyq bilim berý resýrastary óte kóp. Olar salyp otyrady. Biz naryqty saraptap, kompanıa taptyq. 2014 jyldan bastap bul resýrstardy myńnan astam mektep, onyń ishinde Nazarbaev zıatkerlik mektepteri de paıdalanýda. Nazarbaev zıatkerlik mektebinde 50 myń ınteraktıvti sabaq bar. Sondyqtan joǵary sapaly sandyq bilim berý resýrstaryna barlyq balanyń, ásirese aýyl mektepteriniń qoljetimdiligin qamtamasyz etý barynsha mańyzdy dep sanaımyz», - dedi Erlan Saǵadıev.

---