InfoHub Logo

Búginde mektepterdi keń jolaqty ınternetke qosý salasynda biryńǵaı texnıkalyq saıasat joq. Sonyń saldarynan bilim jáne ǵylym mınıstrligi elektrondy kúndelik sıaqty jobalardy tolyqqandy iske asyra almaı otyr.

"Búginde elektrondy kúndelikterdi tolyqqandy paıdalaný úshin keń jolaqty ınternet asa qajet. "Sonyń arqasynda biz qaǵazbasty jumystan arylamyz. Jalpy, osy saladaǵy sharalar bilim berý salasyn sıfrlandyrýǵa jol ashady. Sol kezde árbir balanyń jeke kabıneti bolady. Onda balabaqshadan bastap PhD-ǵa deıingi barlyq aqparat, barlyq baǵalar saqtalady. Olımpıadalar, portfolıo, dıplomdar - bári-bári elektrondy úlgide saqtalady. Bunyń barlyǵyn iske asyrý úshin mektepterde keń jolaqty ınternet bolýy qajet", - dedi QR Bilim jáne ǵylym mınıstri Erlan Saǵadıev Úkimettiń búgingi otyrysynda.

Mınıstrdiń sózine qaraǵanda, qazirgi kezde respýblıka boıynsha mektepterdiń 98 paıyzy ınternetke qosylǵan. Alaıda sekýndtyna 4 MBıt bolatyn keń jolaqty ınternet tek 2 400 mektepte ǵana bar. Ol 34 paıyzdy quraıdy.

"Bıyl keń jolaqty ınternetpen qamtýǵa arnalǵan qarjy transfer arqyly jergilikti búdjetterde de qarastyryldy. Alaıda biz jergilikti bıliktiń mektepterge ınternetti qosý qyzmetterin satyp alýlaryn zerdeleı kele, osy saladaǵy jumystyń tıimsiz júrgizilip jatqanyn anyqtady. Sebebi biryńǵaı texnıkalyq saıasat joq. Osynyń saldarynan ınternettiń jyldamdyǵy da ár alýan bolyp jatady. Sosyn satyp alýlar bir ýaqytta atqarylmaǵannan keıin ınternetke qosylmaı qalǵan mektepter az emes. Bizdińshe, bul jumysty úılestirip otyrý qajet. Al aqparat jáne komýnıkasıalar mınıstrligi baqylaýdy óz qolyna alýy tıis", - dep atap kórsetti mınıstr Saǵadıev.

Derekkóz: QazAqparat

---