InfoHub Logo

Jolyńdy alla qoldasyn,
Jamanshylyq bolmasyn.
Senimdi bolsyn joldasyń,
Jolyńdy kesken ońbasyn.
Sátti bolsyn isteriń,
Jaqsy bolsyn tústeriń,
Jumsaq bolsyn ishkeniń.
Kórmegen jerdi kórip qaıt,
Yrzyǵyńdy terip qaıt.
Aıdaryńnan jel esip,
Jelip baryp, jelip qaıt.
Áýmın!

*** *** *** ***

Ia, Alla jarylqa!
Jarylqaǵannyń ishinde et.
Túgel páleden aman et,
Saqtaǵaısyń sálemet!
Keshki tileýin keshiktirme,
Erteńgi tileýin zaryqtyrma!
Aýzy qandy bóriden saqta,
Qoly qandy urydan saqta!
Kúle kirip, kúńirene shyqqannan saqta,
Bireýdiń haǵyn jep, tyqqannan saqta!
Tórde otyryp mekirengennen saqta,
Sháıkiniń astynan shekireıgennen saqta!
Basyńa baqyt berip,
Bul dúnıede jıǵanyń bolsyn,
Ol dúnıede ımanyń bolsyn!

*** *** *** ***

Ýa, Jaratqan, jarylqa,
Baq-dáýletin aýmas qyl,
Jarylqaǵanmen jalǵas qyl!
Alaýyzdy alys qyl,
Qorǵanǵannan qalys qyl!
Nıetteri aq bolsyn,
Beınetteri pák bolsyn!
Murattaryn asyl qyl!
Qolqasyn shań qappasyn,
Júrgen jerin jasyl qyl!

*** *** *** ***

Dalaqtaǵan daýdan saqta,
Jalaqtaǵan jaýdan saqta!
Ashyqqan bóriden saqta,
Qara jerdiń tar kórinen saqta!
Ashynǵan urydan saqta,
Qulqyny qurdan saqta!
Jylannyń zárinen saqta!
Aıaq astynan keziger
Bále-jalanyń bárinen saqta!

*** *** *** ***

Iá, qudaıym ońdasyn,
Oń jolyna bastasyn.
Jortqanda jolyń bolsyn,
Joldasyń perishteler bolsyn.
Jer júzindegi qaterden
Jappar Ieme tapsyrdym!
Sýdan keler qaterden,
Sapardaǵy qaterden        
Jaratýshy jan Iem,
Saqtaı gór  - dep tapsyrdym!
Bir Allah Ózińe tapsyrdym!        
Qaıyrly dáýlet bersin
Halyqqa tatýly ómir bersin!
Ótkenge ıman bersin
Tirige – bereke bersin
Jastarǵa ǵumyr bersin
Halqymyzǵa birlik bersin!
Áýmın, Allah ákbar!  

*** *** *** ***

Kúniń shýaqty bolsyn,
Kóliń sýatty bolsyn!
Qonysyń óristi bolsyn,
Ekkeniń jemisti,
Eńbegiń kelisti bolsyn!
Juldyzyń aǵańda bolsyn,
Qundyzyń jaǵańda bolsyn!
Jaryń jibekteı bolsyn!
Aryń túlekteı bolsyn!
Óneriń órleı bersin,
Ómiriń tórleı bersin!
Áýmın!

*** *** *** ***

Jarylqa, Allah, qabyl et,
Jarylqaýdyń qamyn et!
İzet-abyroı, baq-dáýlet,
Bereke ornap baq qonsyn,
Ne tileseń,
Sonyń bárin qabyl et!
Áýmın.

*** *** *** ***

Jaz kelip kóńiliń jaı bolsyn,
Kórgeniń shattyq toı bolsyn!
Abzal dosyń kóp bolsyn,
Bergen batam sol bolsyn!
Áýmın!

*** *** *** ***

Áýmın deseń maǵan,
Qudaı bersin saǵan!
Oń jaǵyna qarasań,
Altynnan terek ornasyn!
Sol jaǵyńa qarasań,
Kúmisten terek ornasyn!
Esh jamandaq bolmasyn,
Aman bolsyn mal-basyń!

*** *** *** ***

Bes qarýyń saıly bolsyn,
Jortqan jolyń jaıly bolsyn.
Kúniń shyǵyp jarqyrap,
Túniń tynysh, aıly bolsyn.
İshkeniń zámzám sý bop,
Urtyń toly maıly bolsyn.
Bir Alla ózi jebesin,
Arýaqtar demesin.
Ǵaıyp Eren, qyryq Shelten,
Tıgizsin dáıim sebesin.
Nuh paıǵambar aldyńnan,
Teńizde tossyn kemesin.
Altyn kúnde alty aılyq,
Arymaı-talmaı jol alǵyn.
Aman-esen oralǵyn,
Dál búgindeı qol alǵyn.

*** *** *** ***

Baqytty bol, qaraǵym,
Qara kózim maralym.
Altynnan bolsyn taraǵyń,
Kúmisten bolsyn jaraǵyń.
Qýanysh, kúlkiń tyıylmaı,
Jarqyraı bersin qabaǵyń.
Maqtanyshy bola bil,
Atań menen anańnyń.
Tilegińe jete ber,
Ońyńnań esip samalyń.

*** *** *** ***

Oralýyń tez bolsyn,
Qasqa joldyń boıynda
Qyzyr babam kez bolsyn.
Óziń jaıly jat elde
Jyly-jyly sóz bolsyn.
Kóre almaǵan dushpannyń,
Eki kózi bóz bolsyn.
Ketilmesin tulparyńnyń tuıaǵy,
Qaıyrylmasyn suńqaryńnyń qıaǵy.
Barǵan jerde qushaq jaıa qarsy alsyn,
Jaqsy adamdar, jaısań jandar zıaly.
Jalpaq elmen, jaqsy jermen tanysqyn,
Alla jebep, ushqan quspen jarysqyn,
Kóńiliń shat, at-kóligiń arymaı,
Otbasyńmen aman-esen tabysqyn.
Áýmın

*** *** *** ***

---