InfoHub Logo

Naýryz kelip qar ketti,
Aq qar, kók muz jutatqan
Sharýa elinen zar ketti.
Naýryz kelip jaz kirdi,
Jaz perishte «Áz» kirdi
Kúneske tosyp arqasyn,
Jan bitkenge naz kirdi.
Aryq-turaq tórt túlik,
Kók jep japa-tarmaǵaı
Qabyrǵa jappaı qalmaǵaı.
Kóteremniń tórt buty,
Erbegeı de serbegeı
Endi shyǵyn bermegeı.
Bizge kelgen báleket –
Qarmen birge qańǵyryp,
Taýdan ary órlegeı,
Musylman betin kórmegeı.

*** *** *** ***

Jarapazan batasy
Qonaqtasyn bereket,
Qasha bersin páleket.
Qıyn deıdi qıamet,
Jaqyn deıdi aqyret.
Aqyretke barǵanda,
Qyl kópirden aman ót!

*** *** *** ***

Mine, bata, aq nıet,
Bola bersin bereket.
Qıyn deıdi qıamet,
Jaqyn deıdi aqyret,
Qulshylyq qyl Allaǵa,
Qyl kópirden taımaı ót.
Kirsin dáýlet,
Shyqsyn beınet.
Alla atymen beınet et.
Joq-jitikke raqym et.
Táńir seni qoldasyn,
Ýaıym-qaıǵy bolmasyn.
Qabyl bolsyn orazań,
Áýletińdi ońdasyn!

*** *** *** ***

Muzafar Álimbaev

Qaryq qyp qutty Naýryz,
Qazanǵa tolsyn sary ýyz.
Qaınasyn Naýryz kóje de,
Toltyryp ishkeı kezeńe.
Ulystyń uly kúninde,
Kóppenen birge kúlimde.
Kóbeısin jańa dostaryń,
Molaısyn elge qosqanyń.
Jarasyp kóńil hoshtyǵy,
Bekisin halyq dostyǵy.
İshinde júrse azǵana,
Shaıylsyn ókpe, naz-nala.
Aldyǵa syımaı sábıler,
Qushaǵyn jaısyn jańa úıler.
Jastardyń samsap otaýy,
Meıirim tóksin Otany.
Áspettep ata dástúrin,
Ásem bop óssin jas býyn.
Kirbiń tartpasyn káriler,
Baryńnyń dámdi nárin ber!
Dúrlegen Qazaqstanǵa
Tańǵalsyn dos ta, dushpan da!

*** *** *** ***

Ulys kúni qutty bolsyn,
Aq ketpesin tańdaıdan!
El irgesi myqty bolsyn,
Baq ketpesin mańdaıdan!
Allahý akpar!

*** *** *** ***

Orazaqyn Asqar

Nıetteriń aq bolsyn,
Naýryzdyń aqsha qaryndaı.
Bastaryńa baq qonsyn,
Shashyńnyń barlyq talyndaı.
Sanasy ósip adamnyń,
Kóńilde kir qalmasyn.
Quty qashyp jamannyń,
Jaqsy tapsyn jalǵasyn.                                                            
Tynysh bolsyn dalamyz,
Túgel bolsyn nýymyz.
Taza bolsyn aýamyz,
Tunyq bolsyn sýymyz.
Qatygezdik joq bolsyn,
Oralmasyn kez ógeı.
Kirisimiz kóp bolsyn,
Búgingi Naýryz kójedeı.
Allahý akpar!

*** *** *** ***

Ulys kúni qazan tolsa,
Ol jyly aq mol bolar.
Uly kisiden bata alsa,
Sonda oljaly jyl bolar.

*** *** *** ***

Ulys oń bolsyn,
Aq mol bolsyn.
Qaıda barsa jol bolsyn!
Ulys baqty bolsyn,
Tórt túlik aqty bolsyn!
Ulys bereke bersin,
Báli-jala jerge ensin!

*** *** *** ***

Jańa jyl baqyt jyly bolsyn,
Malyń toq,
Ýaıym-qaıǵy joq bolsyn.
Kógen toly qozy,
Jeli toly qulyn bolsyn.
Malyń bazarly,
Ulyń nazarly,
Qyzyń ajarly bolsyn!

*** *** *** ***

Áýeli, qudaı ońdaı kór,
Oń jolyna bastaı kór,
Adassa jolǵa sala kór,
Súrinse qoldan ala kór!
Kezdesse shaıtan qaǵa kór!
Juldyzdarmen jalǵastyr,
Jaqsylarmen janastyr,
Jamandardan adastyr!

*** *** *** ***

Baı qylsyn,
Tórt túlik saı qylsyn,
Ketpes dáýlet bersin,
Otaýyńa sáýlet bersin.
Bastaryńa baqyt qonsyn,
Qastaryńa nóker tolsyn.
Dushpandaryń joq bolsyn.
Kóre almaǵan qaskóıdiń,
İshi kúıip shoq bolsyn.
Rızyq, násibiń tasyp,
Kóńilderiń toq bolsyn.
Týǵan balalaryń er jetip,
Ósip úlken el bolsyn,
Baqtalasyń kem bolsyn.
Dáýletiń shalqyp, sel bolsyn,
Dastarqanyń keń bolsyn!

*** *** *** ***

Halaıyq tez serpilip, óńi kirer,
Sharýasy talapty erdiń órleı berer.
Ulystyń uly kúni jaıly bolyp,
Qudaıym alash jurttyń qoldap júrer!

Qazaǵym, naýryz aıyń qutty bolsyn,
Maldaryń aman tóldep sútti bolsyn.
Aǵaıyn árqashanda qoǵamdasyp,
Ózara ylǵı tatý-tátti bolsyn!

Kóz jasy jetim-jesir ıe bersin,
Ulys kúni dáýletti úıe bersin.
Esirkep ǵaryptardy qadyr Alla,
Olarǵa bıe menen túıe bersin!

Áleýmet, baq, ornatsyn naýryz aıy,
Ońdy bop el jurtymnyń, hal-jaǵdaıy.
Qar ketip, jer qaraıyp, kún jylyndy,
Ár úıdiń oınaqtasyn taılaq-taıy.

*** *** *** ***

Iá, Qudaıym!
Dáýletti bas bersin,
Baqytty as bersin.
Ulystyń uly kúninde!
Ulyń ońǵa qonsyn.
Qyzyń qyrǵa qonsyn.
Malyń óriske tolsyn,
Dáýletińdi asyrsyn,
Dushpanyń basylsyn.
Meniń bergen bul batam –
Ulys kúnge saqtap júrgen súr batam.
Mingenderiń balalar,
Jorǵa-jorǵa taı bolsyn,
Jorǵalatyp kelgenge
Kóptiń kóńili jaı bolsyn!
Aı jaǵyńa qarasań,
Altynnan terek ornasyn
Aıynda kelgen meımanyń,
Soǵan atyn baılasyn.
Kún jaǵyńa qarasań,
Kúmisten terek ornasyn.
Kúnde kelgen meımanyń,
Soǵan atyn baılasyn.
Tań mezgili bolǵanda,
Naýryz kúni týǵanda,
Boz toǵaıdaı shýyldap,
Bódenedeı pyryldap,
Berekeli qut bolyp,
Qydyr kelip daryǵaı!
Astyr-tastyr,
Juldyzdarmen jalǵastyr,
Jaqsylarmen jalǵastyr,
Jamandardan adastyr!
Áýmın

*** *** *** ***

Ulysyń oń bolsyn,
Aq mol bolsyn,
Qaıda barsa da jol bolsyn!
Ulys baqty bolsyn,
Tórt túlik aqty bolsyn!
Ulys bereke bersin,
Bále-jala jerge ensin!
Áýmın

*** *** *** ***

Órkeniń óssin,
Órisiń keńeısin.
At jalyn tartyp minip,
Halqyńnyń qamyn jegeısiń.
Tileýińdi berip,
Baǵyńdy ashsyn.
Aınalyp kelip aı men jyl,
Aman-esen kórýge jazsyn!
Áýmın

*** *** *** ***

Táńirim jazdaı bersin,
Jazdaı berse jazylyp,
Kókireginde ıman oty mazdaı bersin,
Táńirim kúzdeı bersin,
Kúzdeı berse qutaıyp,
Rızdyǵyn mańdaı termen izdeı bersin.
Táńirim qystaı bersin,
Qystaı berse, qysylmaı
Ynsappenen tizginiń teń ustaı bersin.
Táńirim kóktemdeı bersin,
Kóktemde kókteı ónip,
Talabyń kókke órleı bersin!
Tyshqan jyly tynyshtyq ber,
Sıyr jyly yrys-qut ber,
Barys jyly mal-basymdy ósir,
Qoıan jyly jaıly qonysqa kóshir.
Qoıan jyly jurttan jylý suratpa,
Ulý jyly ul-qyzymdy jylatpa,
Jylqy jyly jetkize gór muratqa.
Áýmın

*** *** *** ***

Ýa, Jaratqan Iem!
Halqymdy dalasymen saqta.
Elimizdi danasymen saqta,
Sábıdi anasymen saqta
Azamatty sanasymen saqta
Jurtymdy qasiret-qaıǵydan saqta
Halyqqa tóngen qaýipten saqta
Tabıǵı apattardan saqta.
Ýa, halqym baýyryń bútin bolsyn!
Sarqylmas qutyń bolsyn!
Kúnimiz ulysty bolsyn!
Jerimiz yrysty bolsyn!
Elbasy birlikke sebepti bolsyn!
Jappar Iem jar bolyp
Bul bata qabyl bolsyn!
Áýmın, Allahý ákbar!

*** *** *** ***

Ústińnen qaz qańqyldap ótpesin,
Burama temir, som altyn,
Sýǵa salsań batpasyn,
Táńir bergen nesibeń
Tepkileseń, ketpesin.
Jelińniń bir shetine
Oq shyrqasań, jetpesin,
Senen baılyq ótpesin.
Esigińniń aldynan
Elý ingen bozdasyn,
Qorańnan bes júz saýlyq qozdasyn.
Qoıshyńdy maqtap salǵaısyń,
Bultty kún jaýyn jaýǵanda,
Adyrly jerge jaıǵanda,
Qoıynan aırylyp qalmasyn.
Qasqyrǵa qoıyn bermesin.
Sóıtip qudaı ońdasyn,
Jylqyń seniń myń bolsyn,
Jylqy degen jaqsy mal,
Bes aýlyńa baqtyryp,
Bes aıdynnan sýaryp
Betegeli taýǵa jaba sal,
Sıyryń seniń myń bolsyn,
Qysyń qatty bolǵanda
Qamysty jerge aıdap sal,
Áýmın!

*** *** *** ***

Allah seni qoldasyn!
Kópke basshy kósem bol,
Sóıler sózge sheshen bol,
Qaýip penen qaterden
Árqashan da aman bol.
Uly sózge qysqa bol,
Luqpandaı hákim bol,
Eńbek etip elińe
Halqyńa sondaı jaqyn bol.
Tóle bıdeı ádil bol,
Áıtekedeı top jarǵan
Elińe sondaı málim bol.
Panasyzǵa pana bol,
Balasyzǵa bala bol,
Ádil sheship ár isti
Aqylyń asqan dana bol!
Áýmın, Allahý ákbar!

*** *** *** ***

Qolyńdy jaı jamaǵat,
Men bir bata bereıin,
Áýeli Allah ońdasyn!
Bar isti Ózi qoldasyn.
Kórgen qyzyq mereıiń
Toıdan toıǵa ulassyn.
Áýletińe basyńa
Esh jamandyq bolmasyn.
Úıde, túzde bolsań da
Perishteler bolsyn joldasyń.
Tatý-tátti tirshilik
Elimizge ornasyn.
Bolashaqty alańsyz
Jaratqan Iem joldasyn.
Ár azamat osyǵan
Úles qosýdy oılasyn.
Biz tilektes adambyz
Perishteler Áýmın dep
Bir Allah bizdi qoldasyn!
Áýmın Allahý ákbar!

*** *** *** ***

Ulys baqty bolsyn,
Tórt túlik aqty bolsyn!
Ulys bereke bersin,
Bále-jala jerge ensin!
Uly halqym toq bolsyn,
Kóılekteriń kók bolsyn!
Qaıǵy ýaıym joq bolsyn,
Qýanyshtaryń kóp bolsyn!

*** *** *** ***

Ulys baqty bolsyn!
Ár kúnimiz jaqsy bolsyn!
Dostyǵymyz berik bolsyn!
Óner-bilim serik bolsyn!

*** *** *** ***

Iá, Qudaıym!
Dáýletti bas bersin,
Baqytty as bersin,
Ulystyń uly kúninde!
Ulyń ońǵa qonsyn,
Qyzyń qyrǵa qonsyn.
Malyń óriske tolsyn,
Dáýletińdi asyrsyn,
Dushpanyń basylsyn.
Meniń bergen bul batam –
Ulys kúnge saqtap júrgen súr batam.
Mingenderiń, balalar,
Jorǵa-jorǵa  taı bolsyn.
Jorǵalatyp kelgende
Kóptiń kóńili jaı bolsyn.
Aı jaǵyńa qarasań,
Altynnan terek oınasyn.
Aıyńda kelgen meımanyń,
Soǵan atyn baılasyn.
Kún jaǵyńa qarasań,
Kúmisten terek oınasyn,
Kúnde kelgen meımanyń
Soǵan atyn baılasyn.
Tań mezgili bolǵanda
Naýryz kúni týǵanda
Boz torǵaıdaı shýyldap,
Bódenedeı pyryldap,
Berekeleri qut bolyp,
Qydyr kelip daryǵaı!
Astyr-astyr,
Juldyzdarmen jalǵastyr,
Jaqsylarmen janastyr,
Jamandardan adastyr.
Áýmın

*** *** *** ***

E, patsha qudaı, esińe al!
Óziń jarylqasań, bylaıǵynyń nesi bar?
E, patsha qudaı, áýeli óz kárińnen saqta,
Shaıtannyń sherinen saqta,
Patshanyń kárinen saqta.
Qadamy qattydan saqta,
Qatty tóngennen saqta,
Jıylǵan nýdan saqta,
Tasyǵan sýdan saqta.
Uıytqyp janǵan órtten saqta,
Yńyranyp jatqan dertten saqta!
Áýmın

*** *** *** ***

Tyshqan jyly tynyshtyq ber,
Sıyr jyly yrys-qut ber,
Barys jyly mal-basymdy ósir,
Qoıan jyly aıly qonysqa kóshir.
Qoıan jyly jurttan jylý suratpa,
Ulý jyly ul-qyzymdy jylatpa,
Jylqy jyly jetkize gór muratqa!

Jylan jyly jut kórip,
Jyraq ketse bosqan el:
Jylqy jyly jurt bolyp,
Eldiń basyn qosqan el.
At sabyltyp baryssyn!
 
Qoı jylynda qopańdap,
At quıryǵyn kesken dos,
Meshin jyly máz bolyp,
Túıistirip tós pen tós,
Quda bolyp tabyssyn!
 
Taýyq jyly shyqqan daý –
It jylynda el uıyp,
Toıǵa ulasyp jónelsin.
Dońyz jyly shapqan jaý –
Tyshqan jyly shómıip,
Domalanyp ol ólsin!
Jylan jylǵy urysta
Sheıit bolǵan batyrdyń
Besikte qalǵan balasy
Múshelge tolyp jas bolsyn,
Aǵaıynǵa bas bolsyn.
Ákege tartyp týsyn ol,
Ádilet jolyn qýsyn ol.
Atyna qamshy salsyn ol,
Atanyń kegin alsyn ol!
 
Qoıan jyly taqyrda
Jesir qalǵan paqyrdyń
Jetektegen jalǵyzy
Múshelge tolyp boı jetsin,
Ár qıanǵa oı ketsin,
Kóp bop qorǵap tepkiden,
Qutty kelin atansyn,
Aqsaqaldan bata alsyn.
Turmys kúıi qurýly,
El bop ónsin rýly!

---