InfoHub Logo

Sháýten degen bala bar edi. Onyń bir ádemi aq qozysy bar edi. Sháýten aq qozysyn jaqsy kórýshi edi. Qozysynyń enesin apasyna ózi saýdyrýshy edi. Qozysyn ózi kógendep, ózi aǵytýshy edi.

Sháýtenniń aıaǵynda sháýtıgen ǵana shárkeıi bar edi. Aǵytyp jatqanda qozysy Sháýtenniń aıaǵyn basyp, shárkeıiniń ultanyn túsirip, jyrtyp-jyrtyp ketti. Sháýten shárkeıine jylap jiberdi.

Apasy:

— Qoı, balam, jylama! Osy qozynyń óziniń júnin shárkeı ǵyp berem, onda qaıter eken, — dedi.

Aq qozy úlken marqa boldy. Kishkene kúndegi ádemi aq buıra júnderi uzynnan-uzyn bolyp ketti. Sháýten de ósti. Jamaýly jaman shárkeıi kishkeneden-kishkene bolyp, aıaǵyna sımaı qaldy.

Sháýten:

— Apa, shárkeıim aıaǵyma sımaı qaldy, — dedi. Apasy:

— Endeshe aqmarqańdy qyryqtyryp ákele ǵoı, balam, — dedi. Sháýten Sansyzbaıǵa marqasyn qyryqtyrdy.

Sháýten apasyna:

— Apa, marqany qyryqtyrdym, júnin ákeldim, endi shárkeıim boldy ma? — dedi.

Apasy:

— Joq, balam, júndi sabaıyn, — dedi.

Apasy tulaq jaıdy. Aýyldyń qatyn-qalashyn jınap, júndi sabady.

Sháýten apasyna:

— Apa! Shárkeıim endi boldy ma? — dedi. Apasy:

— Joq, balam, shıge tartamyn, — dedi.

Qatyndar júndi shıge shabaqtady, appaq maıdasyn betine tartty.

Sháýten apasyna:

— Apa, shárkeıim endi boldy ma? — dedi. Apasy:

— Joq, balam, sý quıyp, súıretemiz, — dedi.

Sý seýip, shıge orady, eki kisi tartyp, ózgesi tepti. Sháýten apasyna:

— Apa, endi shárkeıim boldy ma? — dedi. Apasy:

— Joq, balam, bilekteımiz, — dedi

Apalary bilektedi. Bir jazyp, bir búktep, kóp-kóp bilektedi. Sháýten apasyna:

— Apa! Shárkeıim endi boldy ma? — dedi. Apasy:

— Joq, balam, shárkeıdi endi qarpımyz, — dedi. Apalary kıizdi tikti, qaıta-qaıta qarpı berdi. Sháýten apasyna:

— Apa, endi shárkeıim boldy ma? — dedi. Apasy:

— Joq, balam, kepsin, — dedi.

Apasy kıizdi taza jerge jaıyp tastady. Sháýten apasyna:

— Apa, shárkeıim endi boldy ma? — dedi. Apasy:

— Joq, balam, endi pisiremiz, — dedi. Qaıtadan qaıta-qaıta bilektedi. Sháýten apasyna:

— Apa, shárkeıim endi boldy ma? — dedi. Apasy:

— Joq, balam, taǵy da kepsin, — dedi. Apasy kıizdi taǵy dalaǵa jaıyp qoıdy.

Sháýten apasyna:

— Apa, shárkeıim endi boldy ma? — dedi. Apasy:

— Joq, balam, pishemin, — dedi.

Apasy qaıshymen eki shárkeı piship aldy. Shárkeılerdiń jelkesi qyjyraıyp, basy aqmarqanyń kishkene kúnindegi syqyldana qaldy. Sháýten jymyń etti. Sháýten apasyna:

— Shárkeıim endi bitti me? — dedi. Apasy:

— Joq, balam, jún shúıkeleımin, — dedi. Apasy shýda shúıkeledi. Sháýten apasyna:

— Apa, shárkeıim endi bitti me? — dedi. Apasy:

— Joq, balam, jip ıiremin, — dedi. Apasy jip ıiredi.

Sháýten apasyna:

— Apa, shárkeıim endi boldy ma? — dedi. Apasy:

— Joq, balam, syrımyn, — dedi.

Apasy jipti ınege sabaqtap alyp, kóp-kóp tigip, syrydy. Sháýten apasyna:

— Apa, shárkeıim endi boldy ma? —dedi. Apasy:

— Joq, balam, ultaramyn, — dedi. Apasy ultan salyp ultardy. Sháýten apasyna:

— Apa, shárkeıim endi boldy ma? — dedi. Apasy:

— Iá, balam ... boldy. Kel, aıaǵyńa kı, — dedi.

Sháýten kıip aldy. Aıaǵyna shap-shaq qana, ádemi, aq shubar shárkeı bolypty. Sháýten qýandy. Apasyn qushaqtap, betinen súıdi. Sháýten marqasyna kelip:

— Mine, bálem! Meniń shárkeıim, — dedi. Marqasy:

— İm-im-im-im... — dedi.

(1929 jyl. Latyn árpinen túsirilgen).

---