InfoHub Logo

2020 jyly 3 jeltoqsanda Ál-Farabı atyndaǵy Qazaq Ulttyq ýnıversıteti jáne «TILEU-QABAQ» qoǵamdyq qory birlese otyryp Qazaqstan tarıhy kafedrasynyń uıymdastyrýymen Altyn Ordanyń qurylýyna 750 jyl tolýyna oraı «Er Edigeniń Altyn Orda tarıhyndaǵy orny» atty onlaın formatta respýblıkalyq ǵylymı-tájirıbelik konferensıa ótkizdi.

Konferensıa ashylýynda Ál-Farabı atyndaǵy QazUÝ-nyń birinshi prorektory, QR UǴA akademıgi M.M. Búrkitbaev sóz basyn alyp, aıtýly is sharaǵa jyly lebizin bildirdi. Ári qaraı májilis Qazaqstannyń túpkir-túkpirinen kelgen tarıhshy ǵalymdar men fılosoftardyń qyzý talqylaýyna tústi. Solardyń biri S. Báıishev atyndaǵy Aqtóbe ýnıversıtetiniń profesory Asan Jumanazar myrza Edige bıdiń tarıhı beınesi týraly máselerdi qozǵaı otyra, tulǵanyń jerlengen jeri týraly tyń málimetter berip ótti. Sonymen qatar t.ǵ.d., profesor Talas Omarbekovte Er Edigeniń tarıhı róli men Altyn Orda tarıhyna qosqan úlesin qarastyryp, taqyrypqa qatysty qazirgi kezdegi konseptýaldyq kózqarastar men aıtylmaı júrgen aýqymdy maǵlumattar qorymen bólisti.

Ǵylymı konferensıa jumysy pánaralyq baılanys negizinde Altyn Ordadaǵy saıası qarym-qatynastar men ondaǵy jekelegen tulǵalardyń qyzmetin qazaq memlekettiliginiń qalyptasý tarıhyna qosqan úlesi aspektisinde qarastyrýǵa arnaldy. Jáne de Eýrazıa qurlyǵyndaǵy saıası, mádenı jáne áleýmettik tarıhty zertteýge baılanysty júrgizilgen arheologıalyq izdenister men jumystar negizinde jasalǵan tyń tujyrymdar men ǵylymı jańalyqtar saraptaldy.

Konferensıa sońynda «TILEU-QABAQ» qoǵamdyq qorynyń tóraǵasy S.S. Jantórenov myrza qorytyndy sózin sóıleı otyryp, ýnıversıtetke sondaı – aq konferensıany uıymdastyrýshylaryna alǵys hat tapsyryp, Qazaqstan tarıhy kafedrasynyń meńgerýshisi, QR UǴA akademıgi, tarıh ǵylymdarynyń doktory, profesor B.B. Káribaevti konferensıanyń joǵary deńgeıde ótýine baılanysty Alǵys hat jarıalaı otyryp, «Er Edige» medalimen marapattady.

t.ǵ.k.,  dosent Qozǵambaeva G.B ,  Tarıh, arheologıa jáne etnologıa fakúltetiniń 1 kýrs magıstranty Ábdinazar A.N

---