Bir Shymshyq torǵa tústi sory qaınap,
Bardy ma, kim biledi, ajal aıdap.
Báleni qaza menen qaıda deme,
Ǵarip bop, otyr sorly kózi jaınap.
Janyna jas Kógershin ushyp keldi:
«Ne qara basty torǵa túsip? - dedi. -
Tal túste tordy kórmeı, soqyr ma ediń,
Esalań, aqylyń joq, kúshik, - dedi. -
Túser me esi durys kúndiz torǵa,
Aqylyń joqtyǵynan qaldyń sorǵa.
Mysaly, meni aldap esh ýaqytta,
Tor túgil, túsire almas onan zorǵa.
Kim kúlmes bostyǵyńa sen jamannyń,
Aldyrǵan aılasyna bir nadannyń.
Men saǵan qol bereıin túspesime,
Amaly saǵan ǵana mol adamnyń».
Dese de: «Aqyl serik qonǵan baqqa»,
Em bolmas basta baǵyń taıar shaqta.
Pysyqsyp Kógershinim otyrǵanda,
Qalypty ózi túsip qyl tuzaqqa.
- Aqylyń qaıda ketti, danyshpanym,
Sert etip túspeske qol alysqanyń?
Bireýge kúlseń - keler óz basyńa,
Tabalap munan bylaı kúlme, janym!
Bireýdi bilmes adam tabalaıdy,
Baq kóshse, aqylyńa qaramaıdy.
İsińnen bir istegen jazym tapsań,
Boldy dep bilmegennen shamalaıdy.
«Jazmyshtan ozmysh bolmas» degen sózdi
Beker dep pikir etý jaramaıdy.
«Allanyń adam basy - doby» degen,
Qýsa da qalaı qaraı domalaıdy.

---