InfoHub Logo

Shymkent qalasynda múgedektigi bar azamattardyń quqyqtaryn qamtamasyz etý jáne qoljetimdi orta qalyptastyrý maqsatynda 967 áleýmettik ınfraqurylym nysany tolyq beıimdeldi. Bul kórsetkish 2024 jylǵa josparlanǵan 491 nysannan áldeqaıda joǵary, ıaǵnı jospar artyǵymen oryndaldy.

Elimizde ınklúzıvti saıasat qalaı iske asýda?

Qazirgi ýaqytta Qazaqstanda 2025-2030 jyldarǵa arnalǵan ınklúzıvti saıasat tujyrymdamasy, «Amanat» partıasynyń 2023-2027 jyldarǵa arnalǵan jol kartasy jáne Prezıdent tapsyrmasyna saı «Halyqpen birge» jobasy júzege asyrylýda.

«Amanat» partıasynyń jol kartasyna sáıkes, ınteraktıvti qoljetimdilik kartasyna engizilgen 42 myńnan astam nysandy kezeń-kezeńimen beıimdeý kózdelgen. Josparǵa saı, jyl saıyn osyndaı nysandardyń 20%-y beıimdelýi tıis. 2023 jyly – 20%, 2024 jyly – 40%, 2025 jyly – 60%, 2026 jyly – 80%, 2027 jyly – 100% kórsetkishke jetý josparlanǵan. Búginde respýblıka boıynsha 22 980 nysan tolyqtaı beıimdeldi.

Shymkent qalasynda qandaı nysandar beıimdeldi?

Óńirdegi 967 nysan múgedektigi bar adamdardyń barlyq sanattary úshin qoljetimdi. Onyń ishinde:

• Densaýlyq saqtaý nysandary – 138;
• Bilim berý mekemeleri – 429;
• Mádenıet nysandary – 33;
• Saýda jáne qyzmet kórsetý oryndary – 195;
• Memlekettik jáne kvazımemlekettik uıymdar – 55;
• Sport nysandary – 9;
• Áleýmettik qorǵaý nysandary – 9;
• Ózge de nysandar – 99.

Birinshi toptaǵy múgedektigi bar azamat, Shymkent turǵyny Tólendi Atahaev qalada ınklúzıvti orta qalyptasyp kele jatqanyn atap ótti:
"Múgedektigi bar azamattardyń erkin qozǵalysyna jaǵdaı jasalǵan. Ásirese, medısınalyq mekemeler men bank bólimshelerinde yńǵaıly jaǵdaılar bar. Mysaly, Baıtursynov kóshesindegi «Júrek ortalyǵy» ǵımaratynda pandýstar, taktıldi jolaqtar, mnemosqemalar jáne tegis joldar qarastyrylǵan."

Memlekettik baqylaý jáne tekserýler

2024 jyly Áleýmettik qorǵaý salasyndaǵy retteý jáne baqylaý komıtetiniń Shymkent qalasy boıynsha departamenti 338 tekserý júrgizdi. Onyń ishinde:

• 25 – profılaktıkalyq baqylaý;
• 55 – jospardan tys tekserý;
• 258 – prokýratýra organdarynyń talaby boıynsha.

Nátıjesinde, 61 nysanǵa buzýshylyqtardy joıý týraly uıǵarym berildi, 11,2 mln teńgeden astam somaǵa 35 ákimshilik aıyppul salyndy. Alǵash ret anyqtalǵan buzýshylyqtar úshin nysan ıelerine tek nusqama beriledi, eger olar belgilengen merzimde oryndalmasa, aıyppul salynady.