InfoHub Logo

Anashym, men ǵoı kelgen. Esh alańdama, sabaqtan shyǵyp keldim. Siz meni ýaıymdaǵan bolarsyz. Ákeler de analar sıaqty ýaıymdaı ma eken? Bilmeımin,  Biraq ótkende Álıdiń “mektepke barmasam anam izdep, ýaıymdaıdy” degeni esimde... Sondyqtan surap jatqanym ǵoı... Ótken aptada muǵalim: «Oń qolymda – qalam, sol qolymda – qalamsap», - dep qaıta-qaıta aıtqyzyp, oń men solymdy ajyratýdy úıretkendi... Endi bildim Anashym, oń jaq pen sol jaqtyń ne ekenin, Endi túsindim Anashym, syzdaǵan jerdiń qaı jaq ekenin. Endi túsindim, anashym... Saǵan kelgenimde, myna jaǵym syzdap aýyrady, myna jaǵym degenim esińde me? Syzdaǵan jaqty túsindire almaǵanym esińde me, Anashym? Endi bilemin, mine, myna jaǵym… Sol jaǵym syzdap aýyrady, Anashym... Kún saıyn syzdap mazalaıdy sol jaǵym, Syzdap mazalaıdy... 

Aıshanyń shashyn anasy órip beripti keshe... Anasymen qol ustasyp kelipti mektepke... Ústindegi jeıdesi de toqyma eken. Qońyraý shalynǵanda betinen súıip, «Sabaǵyńa bara ǵoı qyzym», - dedi. Men sonda, eshkimnen jasyrmaı ókirip jyladym. Muǵalim: «Ne boldy?» - degende, «Jáı, súrinip quladym, tizem aýyrdy», - deı saldym. Ótirik aıttym, Anashym. Syzdaǵan tizem emes, sol jaǵym bolatyn, Anashym. Sol jaǵym bolatyn syzdaǵan... «Meniń de shashymdy bireý órse eken», - dedim. Ákem órdi.  Biraq árıne, Aıshanikindeı bolmady. Toqyma jeıdem bolsa eken», - dedim. Ákem: «qyzym, toqı almaımyn ǵoı», - dedi. «Eń bolmasa mektepke deıin birge baraıyq», - dedim. «Qyzym-aý, jumysym bar ǵoı...» - dedi. Kózderim jasaýrap: «Jumysqa barma, endeshe» degenimde: «Nanymyz ǵoı», - dedi ákem. Úndemedim, biraq mektepke deıin jylap bardym... Sol jaǵym qaıta-qaıta syzdaı berdi, Ana. 

Báriniń náskıleri appaq, meniki bolsa bozǵylt. Gúlsim: «Anam aq kıimderdi tústi kirlerge qospaı jýady», - dedi. Ákem bárin qosyp jýady, kir jýýdy bilmegeni me sonda? Ákem kún saıyn nanǵa maı jaǵyp beredi tańǵy asyma. Renjimesin dep aıtpaımyn, Biraq... Synyptaǵylar kúnde toqash, bálish, tátti nan ákeledi. Ákem tátti nan jasaı almaıtynyn bilem ǵoı, Ana.  
Kún batyp barady, men keteıin endi... Sabaqtan shyǵyp saǵan keletinimdi bilmeıdi ákem. Bilip qoısa, uryspaıdy, Biraq... Kóńili bosaıtynyn bilem. 

Topyraǵyńdy kim shashqan, gúlderińdi kim julyp tastaǵan!? Ruqsat berme, anashym, eshkim qol tıgizbesin topyraǵyńa! Áıtpese, sony oılap taǵy jylaımyn ǵoı, ana. 

Qarashy, topyraǵyńnan taǵy bir ýys alaıyn dep, Bet oramal ala keldim... Bilesiń be, anashym? Ár kelgenimde bir ýystan alyp, Bir bankaǵa jınadym topyraǵyńdy...

Ústine sýretińdi jabystyryp, tósegimniń basyna qoıdym. Kúnde tańerteń ony qumarlana ıiskep súıemin. Eshkimge aıtpa – biraq keıde... Keıde sýretińmen de sóılesemin... Qaıtem endi, seni qatty saǵyndym... 

«Erteń ana týraly shyǵarma jazyp kelińder», - dedi apaı. Ákeme jazǵyzam... Apaı bilip qoısa qatty urysatyn shyǵar,  Uryssa uryssyn. Men seni esh kórmesem, ne dep jazyp túsindirem? Seniń atyńdy estigen saıyn sol jaǵymnyń syzdaıtynyn, Muńǵa batyp, keıde shydaı almaı jylaıtynymdy... Qaǵaz betine qalaısha túsirem? 

Ketýim kerek, Ana, Topyraǵyńdy súıdim... Túsime kirip sen de meni súı. Biraq mindetti túrde túsime kir... Túsime kirmeseń, Sol jaǵym syzdap oıanamyn, ana. Sol jaǵym jylap syzdaıdy, Ana... 

Mine, myna jaq, Sol jaǵym syzdaıdy, ana. Sirá, seni óte qatty saǵynǵanymnan bolar...  

---