InfoHub Logo

Kúnderde bir kún ertede bir shal bolypty. Shaldyń úsh uly bar eken. Bir kúni shal úsh balasyn qasyna alyp otyryp surapty: «Qoramda san jetpeıtin malym bar. Sandyǵymda san jetpeıtin altyn bar. Men ólgende, meni qalaı qylyp kómesińder?» - dep suraǵan.

Kóp kidirmeı-aq balalary kóńilindegi baryn aıtady.

- Oı, men seni jibekke orap aq jýyp, arýlap, shaqyrmaǵan el qaldyrmaı, basyńa myńdap qoı, júzdep jylqy shyǵaram, - degen úlken balasy. Onan soń ortanshy balasyna: «Sen men ólgende qalaı qylyp kómesiń?» - degen shal.

- Oı, men seni qadirlep, basyńa osy maldyń bárin shyǵaram, ataǵyńdy jer júzine ólgen kúni shyǵaryp, el shaqyryp, as berem, ústińe kúmbezden mola saldyram, basyńa atyńdy jazdyryp kók tas qoıǵyzam, - deıdi ortanshy balasy. Onan soń «Ólgende meni qalaı qylyp kómesiń?» - dep suraǵan kishi balasynan shal. Biraz oıǵa qalyp otyrypty da: «Seniń ólýiń biledi, meniń kómýim biledi», - degen kishi balasy.

Kóp keshikpeı bir jyly myqty asharshylyq bolyp, el jutap, asharshylyqtan jurt tegis qyrylǵan, sonda álgi baıdyń tigerge tuıaq maly qalmaı jutaǵan. Eki úlken balasy ashtan ólip, bar mal-janynan shal aıyrylyp, jalǵyz kenje balasy qalypty. Bir kúni shal aýyryp qaza tapqan.
Kenje balasy ústindegi shekpenine orap, jer oshaqqa kómýge-aq shamasy kelipti.

---