InfoHub Logo

Qazaqstan Prezıdenti jastarǵa bergen suhbatynda tabysqa jetý jańa tehnologıalardy ıgerýge jáne olardy ózimiz ázirleýge baılanysty ekendigine de toqtalǵan bolatyn. Elbasymyz óz sózinde: «Nelikten biz ındýstrıalandyrýmen aınalysyp jatyrmyz? Bizde paıdaly qazbalar bar, biraq onyń bári kúnderdiń kúninde taýsylady. Munaı men gaz esebinen órkendegen elder bar, mysaly, Oman. Olardyń munaıy taýsyldy, biraq oǵan deıin qamdanyp, basqa ındýstrıa quryp úlgerdi. Paıdaly qazbalary az bolsa da gúldengen ekonomıkasy bar Ońtústik Koreıa, Shveısarıa, Sıngapýr sekildi elderdi mysalǵa keltirýge bolady. Bul elder bilimniń esebinen damýda. Bizdiń eldiń jalpy ishki óniminiń 53 paıyzy qyzmet kórsetý salasyna tıesili. Bolashaq iri kásiporyndarda emes, tehnologıalarda, – dedi Memleket basshysy.

Buǵan mysal keltirer bolsaq aqparat quraldaryndaǵy derekter boıynsha AQSH-tyq Apple fırmasy basqa ónimderin eseptemegende, bir ǵana Aıfon telefonyn jylyna ortasha 250 mıllıon dana satady eken. Árbir telefonnan shamamen 500 AQSH dollary tabys túsiretin kórinedi. Endi 250 mıllıondy 500-ge kóbeıtseńiz aldyńyzǵa óte, óte qomaqty soma shyǵady. Kóp shıkizatty talap etpeıtin kólemi shaǵyn ǵana ónimnen osynshama tabys túsirýde. Al endi shıki zattardyń kólemi men baǵasyn salystyrar bolsaq, munaı 2015 jyly shamamen bareli 50-60 AQSH dollary, gazdyń 1000 kýb metri shamamen 300 AQSH dollary, bıdaıdyń tonnasy shamamen 200-300 AQSH dollary. Aıyrmashylyq jer men kókteı derlik. Bizdiń de álemde aty shyqqan óndirýshilerge básekeles bola alatyndaı tipti ozyp shyǵatyndaı tehnologıalarǵa jetýimiz kerek. Ǵylymda, tehnologıada ilgerilep otanymyzdyń ekonomıkasynyń gúldenýine at salysýymyz qajet. Árbir azamatymyz da tehnıka, qurylys zattary, azyq-túlik sekildi qajettilikterden syrtqy ónimderdi emes, otandyq ónimderdi tutynýynyń ózi de otandyq kásiporyndarǵa, óz elimizge qoldaý bolyp tabylady.  

---