InfoHub Logo

Soltústik Qazaqstan oblysynyń Tımırázev aýdanyna qarasty «Atameken-Agro-Tımırázev» JSHS-ne ınovasıalyq tehnologıalardy engizýdiń nátıjesinde ónimdilik 20-30 paıyzǵa artqan.

Basylym málimetinshe, Dokýchaev aýyldyq okrýgi aýmaǵynda ornalasqan sharýashylyqtyń ónimdiligi ınovasıalyq sıpatqa ıe baǵdarlamalardyń arqasynda 20-30 prosentke artqany baıqalǵan.

«Atameken-Agro-Tımırázev» JSHS basshysy Aıdarhan Qadyrhanulynyń aıtýynsha, «aqyldy tehnologıalardyń» aýylsharýashylyǵyna berer paıdasy kóp.

«Aqyldy tehnologıalar» arqyly agroónerkásip keshenin qarqyndy damytýdy ıgerýdemiz. Onyń mıneraldyq tyńaıtqysh sińirýdegi, zıankestermen, aramshóppen kúresýdegi, egin egý men astyq jınaýdyń ońtaıly ýaqytyn boljamdaýdaǵy mańyzy orasan. Jańa baǵdarlamalar adam faktoryna, aýa raıyna táýeldilikti azaıtyp, artyqshylyqtaryn tıimdi qoldanýǵa zor múmkindik beredi», – deıdi A. Qadyrhanuly.

Onyń aıtýynsha, aýyl sharýashylyǵy salasyn jańa deńgeıge kóterýdiń bir joly – mashına-traktor parkin jańartý. Ýaqyt kóshinen qalmaýdy basty maqsat etken munda tehnıka kúshi jetkilikti. Joǵary ónimdi 14 egis kesheni men 37 astyq kombaıny, 57 «K-700», «MTZ-80» traktory, 21 «KamAZ» júk kóligi kóktemgi, kúzgi dala jumystarynyń bel ortasynda júredi. Tehnıkalardyjańalaýǵa 258 mıllıon teńgebaǵyttalyp, 87 mıllıon teńgege«Týkano 570» markaly kombaın satypalynǵan.

Sondaı-aq, agrokeshende «dál eginshilik» júıesi qoldanylyp, ol óz kezeginde shyǵyn kólemin azaıtýǵa áser etip jatyr.

«Buryn gerbısıd egistik alqaptarǵa tutas shashylatyn. Endi tehnıkaǵa navıgasıalyq qondyrǵylar ornatylǵaly shyǵyn kólemi 20-25 prosentke deıin azaıtyldy», - deıdi sharýashylyq kombaınshylary.

Buǵan qosa, kombaındar men traktorlarǵa arnaıy baǵdarlamalary bar planshetter qoıylǵan. «GPS» qurylǵylary bar kombaındarda bıdaıdyń salmaǵy men sapasy monıtor arqyly kórsetiledi eken. Janar-jaǵarmaı shyǵyny da naqty esepteledi. Egis alqaptarynyń elektrondy kartasy jasalyp, jer seriginiń kómegimen monıtorıń júrgiziledi.

Maqaladaǵy málimetke sáıkes, sharýa ortalyǵynda eginshilikpen qatar mal sharýashylyǵy da jaqsy damyp keledi. Osy rette, «elektr baqtashy» qurylǵysy satyp alynyp, malshylardyń jumysy áldeqaıda jeńildepti. Maldyń qaı jerde jaıylyp júrgeni kompúter men smartfon arqyly baqylanady. Barlyq veterınarlyq aqparattar elektrondy bazaǵa engizilgen.

Atalǵan agroqurylym 2004 jyly aýyldaǵy «Jamanshubar» seriktestigi negizinde qurylǵan. Qazir jalpy jer kólemi 50 myń gektar. Onyń 32,9 myń gektary egistik alqabyna tıesili. Bıyl 25 myń gektarǵa dándi daqyl, 7443 gektarǵa maıly daqyl egilgen.

---