InfoHub Logo

Biz — oqyǵannan góri, kórip tamashalaǵandy unatatyn urpaqtardyń qatarynanbyz. Búginde ataqty bloger bolýdy armandaýshylar sany burynǵy ǵaryshker nemese órt sóndirýshi bolýdy armandaǵandar sanynan kóp. Sondyqtan bloger bolýdy qalaý nemese jaı ǵana kameramen birge saıahattaý — tańǵalarlyq is emes. Biraq jańa bastap júrgenderge qandaı kamera alǵan jón? Bul maqalada blogerlerge arnalǵan nemese jaı ǵana beınejazba túsirýdi úırengisi keletinderge arnap bes ártúrli kameralar jaıynda sóz qozǵaımyz. Olar óte úlken emes, baǵasy da qol jetimdi, shaǵyn kameralar.

Sony FDR-X3000 — $650

Iá, bul ekshn-kamera, biraq ony kádimgi kamera retinde de qoldanýǵa bolady. Mundaı kishkentaı kameraǵa oryn kóp kerek emes jáne eshkimge kedergi keltirmeıdi. Sonymen qatar, Sony FDR-X3000 ózine uqsas GoPro-dan áldeqaıda jaqsy. Birinshiden, munyń Balanced Optical SteadyShot optıkalyq turaqtandyrǵyshy keremet. Sandyq turaqtandyrǵyshpen birge tamasha sýret beredi. Ony qalaǵan túsirý rejımine qoıa alasyz: optıkalyq, sandyq jáne optıkalyq nemese turaqtandyrǵyshsyz.

Bul kamera óz-ózińizdi túsire berýge yńǵaıly. Kamerany qosasyz, qolyńyzdy sozasyz da vlogty (beıneblog) jaza beresiz. Aıtpaqshy, uıqy kúıinen shyǵý úshin nemese túsirilimdi bastaý úshin bir ǵana túımeni basý jetkilikti, ári bul óte yńǵaıly. Kamerada jazbany bildirip turatyn birden úsh kórsetkish bar. Sondyqtan jazbanyń júrip, ıa júrmeı jatqanynan únemi habardar bolasyz.

Munyń beınejazba túsirý múmkindigi keremet. Ajyratymdylyǵy 4K 100 mb/s bıtreıtimen tek qana jazyp qoımaı, sonymen qatar óńdep bere alady. Oǵan qosa baıaýlatylǵan túsirilimi Full HD kezinde120 k/s jáne 720 pıkselde 240 k/s bar. FDR-X3000 sýret sapasy keremet, biraq bárinen de kameranyń aldyńǵy jaǵynda ornalasqan, túsirilim kezinde jabylyp qalmaıtyn jaqsy mıkrofonnyń bar bolǵany qýantady. Biraq ol sizge azdyq etse, syrtqy mıkrofondy qoldanýǵa bolady. Ol úshin mıkrofondy qosatyn arnaıy tetigi bar. X3000 sý tamshylarynan saqtaıtyn qorǵanys qabatyna ıe. Sonymen qosa taǵanǵa arnalǵan burandasy da bar, GorillaPod-ty qoldanýǵa, taǵannan sýretke túsirýge óte yńǵaıly eken. Túsirilimdi baqylap turatyn dıspleıdiń joqtyǵyn kemshilikke jatqyzýǵa bolady. Syrtyndaǵy birtústi dıspleıden tek mázirge kirýge jáne negizgi kórsetkishterdi baqylaýǵa ǵana bolady. Ekinshi kemshiligi — baǵasynda. Kamera qymbat turady, biraq óziniń ámbebaptylyǵy men múmkinshilikterimen baǵasyn aqtaıdy.

ARTYQSHYLYQTAR:

- Ámbebaptylyq.
- Jaqsy dybys.
- Derbestik.

KEMSHİLİKTER:

- Baqylaıtyn dıspleıi joq.
- Baǵasy.

Canon Power Shot G7 X Mark II — $530

Eger de ekshn-kamera sizdiń kóńilińizden shyqpasa, onda klasıkalyq, yqshamdaý túrin qarastyrǵan jón. Biraz múmkinshilikter jıyntyǵymen qamtylǵan, asa úlken emes kameralar. Osyndaı kameralardyń ishindegi eń jaqsy kameralardyń biri Sony RX100 V, biraq baǵasy óte qymbat 1000 dollar, al Canon G7x MKII-ni onyń jarty baǵasyna satyp alýǵa bolady. Álem boıynsha vlogerlerdiń, ıaǵnı YouTube jelisine salý úshin ózderin beınejazbaǵa túsiretinderdiń súıikti kamerasy bolyp tabylady.

Bul kameranyń eń basty kemshiligi — 4K ajyratymdylyǵynda túsirmeıdi, al qalǵan qasıetteri jaǵynan tamasha úlgi bola alady. 24-100 mm  keremet obektıv ornatylǵan, optıkalyq turaqtandyrǵyshy da turarlyq. Kamera obektıviniń fokýstyq ara qashyqtyǵy yńǵaıly, keń buryshtyq aýqymy 24 mm kezinde vlogtar men tabıǵat kórinisterin túsirýge yńǵaıly bolsa, teleobektıvke deıingi qashyqtyǵy 100 mm kezinde portret túsirýge nemese obektini jaqyndatýǵa yńǵaıly. Dıafragma máni mınımaldy f/1.8, ıaǵnı jaryq kúshi kóp obektıv degen sóz, al dúımdi matrısamen birge qarańǵy túnde de tamasha túsire alady. Kamera obektıvinde zýmdy da dıafragmany da retteı alatyn basqarý saqınasy bar, onyń júrisin birsaryndy úzdiksiz qozǵalystan qadamdyq qozǵalysqa aýystyryp otyrsa bolady.

Jalpy ózi kishkentaı kamera bolsa da basqarý elementteriniń kóptigi tańqaldyratyny sózsiz. Canon-ǵa qajetti batyrmalardy jáne ekrandaǵy mázirge jyldamdyqty artý maqsatynda kerekti túımelerdi engizip qoıǵan. Negizinde G7x kamerasynyń shaǵyn ólshemi — onyń utymdy jeri. Osyndaı kishkentaı kamera kúrtkeniń, joldorbanyń tipti áıelder sómkesiniń qaltasyna syıyp ketedi. Sonymen birge shaǵyn akýmýlátordy syrtqy akýmýlátordyń kómegimen qýattaýǵa bolady, jáne G7x kólemi sapasyna esh kedergi bolmaǵany tańqaldyrady. Siz avtomatty rejımde avtofokýspen de, nemese tolyqtaı qolmen rettep otyryp túsire alasyz. Premıým-shaǵyn apparattar eń aldymen saıahattaǵanda jáne vlog túsirgen kezde qajet, jańadan bastap kele jatqan beıne túsirýshilerge jáne beınege túsirýdiń qyr-syryn úırengisi kelgen talapkerlerge  kómegin tıgizedi.

ARTYQSHYLYQTARY:

- Ólshemderi.
- Avtofokýs.
- Turaqtandyrǵysh.
- Yńǵaıly fokýsty qashyqtyqtar.

KEMSHİLİKTERİ:

- Beıneniń 4K-da túsirilmeýi.
- Álsiz batareıka.

Panasonic Lumix G7 — $690 (14-42 mm Kit)

Panasonic Lumix G7–ni yqshamdy, ásirese qymbat emes kamera dep aıtý qıyn, biraq Lumix GH5–pen salystyratyn bolsaq, onda G7 rasymen de kishileý ári arzandaý kórinedi. G7-de birshama kóp múmkinshilikter bar: sekýndyna 30 kadr túsiretindeı 4K ajyratylymda beıne jazý, fokýs-pıkıng, jolaq jáne kóptegen basqa da baptaýlary bar. G70, bul modýldik múmkinshilikterge ıe júıeli kamera: aýyspaly obektıv, mıkrofondar, monıtor, batareıaly tutqa jáne taǵy da basqalary. Bul kamerany sheksiz jaqsarta berýge bolady, siz eger bir deńgeıge jaqsyraǵyn qalap Lumix GH4 nemese tipti GH5s alsańyz, onda Micro 4/3 formatyndaǵy barlyq obektıvterdi jańa kamerada da qoldanýǵa bolady.

Panasonic Lumix G7 búgingi tańda 4K beınetúsirilimi bar qoljetimdi jalǵyz júıelik kamera desek bolady. Onyń vlog túsirýge bolatyndaı aınalatyn dıspleıi bar, asa qatty aýyr da emes jáne keremet derbestikke ıe. Bul kameranyń kemshiligine qulaqqapty jalǵaıtyn elektrondy shyǵysynyń joqtyǵynda. Ekinshi jaǵynan, munda syrtqy mıkrofonǵa shyǵys bar, bul árıne sapaly dybys jazýda áldeqaıda mańyzdyraq.
Bul kameraǵa qosymsha obektıv satyp alýǵa týra keledi, nemese birden Kit satyp ala salý kerek, ıaǵnı kamera men obektıv jıyntyǵyn. Jıyntyq qarapaıym kelse14-42 mm f/3.5-5.6, baǵasy shamamen 690 dollar. Bul túsirýdi jańadan bastap kele jatqandarǵa jaraıdy. Ýaqyt óte kele siz jaqsy zým, portretke túsirýshi nemese keńburyshty aýqymdaıtyn apparattardyń qajettiligin túsine bastaısyz.

Lumix G7-niń tek bir eleýli kemshiligi — avtofokýs. Ol qatty jyldam da emes, dáldiligi de nashar. Eń jaqsysy avtofokýssyz jumys isteýdi úırený, biraq avtomatıkanyń da ebin taýyp alýǵa bolady. Negizinen Lumix G7-niń ornyn basýshysy bar, eger aqshańyz jetip tursa birden Lumix G80 satyp alsańyz da bolady. Bul kamera da shaǵyn, biraq birshama jaqsartylǵan qosymshalarymen. Aıqyn beıneden, esh qıyndyqsyz beınejazbany qoldyń dirildegeninen qoryqpaı qolmen-aq túsirýge bolatyn matrısalyq turaqtandyrǵyshqa deıin jınaqtalǵan. Mundaı kamera 12-60 mm obektıvpen birge shamamen 1100 dollarǵa shyǵady.

ARTYQSHYLYǴY:

- Beınejazba baptaýlarynyń kóptigi.
- 4K jáne beıne sapasy.
-  Burylmaly dıspleı.
- Aýyspaly obektıvter.

KEMSHİLİKTERİ:

- Avtofokýsy jaqsy emes.
- ISO 800 den keıin shýyldyń bolýy.

Canon EOS M50 — $670 (15-45 mmKit)

Canon — aınaly kamera shyǵarýdan eń tanymal kompanıa. Japondyqtar aınasyz kameralardy jasaýdan biraz ýaqyt artta qalǵan edi. Biraq, jaqyn arada kompanıa EOS M50 kamerasyn jaryqqa shyǵardy. Bul jańadan bastap júrgen blogerlerge jáne vlog túsirýshilerge yńǵaıly,óte qyzyq, qymbat emes kamera. Ózi shaǵyn ǵana. Onyń aýyspaly obektıvteri, jaqsy avtofokýs pen burylmaly dıspleıi bar. EOS M50 4K ajyratylymynda beınejazba túsire alady, eger beınejazbalaryńyzdy UHD ajyratylymynda túsirýdi kózdegen bolsańyz,siz úshin bul óte mańyzdy bolmaq. Eger sizdiń jobańyz Full HD –de bolsa, joǵarǵy ajyratymdylyq beınejazbany baǵdarlamada óńdegen kezde kerek bolady.

EOS M50-diń máziri yńǵaıly, bul Canon qoldanýshylary úshin úırenshikti bolsa, jańadan satyp alǵandarǵa da qoldaný ońaıǵa túspek. Bul kameranyń matrısasy aıtarlyqtaı úlken. Panasonic G7-ge qaraǵanda APS-C sensory úlkendeý, saldarynan M50 jaryqty kóbirek ala alady, fokýstary teń qashyqtyqta bolǵan kezde kadrǵa da aqparat kóbirek beriledi. Sonymen qatar M50 fotosýretke túsirýden nashar emes. Sheber qoldar keremet kadrlar alatyny sózsiz. Biraq biz beınejazba jaıynda aıtyp otyrǵandyqtan, EOS M50-de fırmalyq Dual Pixel CMOS AF tehnologıasy bar ekenin aıta ketken jón. Sirá, bul beınejazba túsirýdegi eń úzdik avtofokýs. Siz vlog túsirip jatqan kezde, ásirese júrip bara jatqanda nemese jaryq az túskende avtofokýs jaıynda ýaıymdamaı-aq qoısańyz bolady. Alaıda, Dual PixelFull HD beınejazbasynda ǵana jumys isteıdi, 4K kamera ádettegi qaram-qarsy avtofokýsymen shekteledi, odan ǵajap týyndy kútýdiń qajeti joq.

Degenmen, EOS 50M baǵasyna qaraı, ádemi fılmder men myqty vlogtar túsirýdi úırengisi kelgen jandarǵa eń jaqsy kameralardyń biri. Sonymen qatar, onyń fırmalyq jalǵastyrýshy tetigi arqyly Canon-nyń úlken tolyq kadrly obektıvterin jalǵap qoldansa bolady. Ol Full HD beınejazbany sekýndyna 50 kadr túsire alǵandyqtan baıaýlatyp túsirý múmkindigine ıe bolasyz, jáne 720 pıksel kezinde sekýndyna 120 kadr túsirse alasyz. Aıta ketetin eń mańyzdy jaıt – M50-diń aq tústisi bar. Birtústi kameralar áleminde bul arpa ishindegi bir bıdaı dese bolady.

ARTYQSHYLYQTARY:

- Tez ári naqty avtofokýs.
- 4K jáne beınejazba sapasy.
- Burylmaly dıspleı.
- Aýyspaly obektıvter.

KEMSHİLİKTERİ:

- Sıymdylyǵy tómen akýmýlátor.

Sony FDR-AX33 — $770

Bul toptamadaǵy jalǵyz beınekamera — Sony FDR-AX33. Mundaı kameralardy «hendıkam» nemese «kamkorder» dep ataıdy, olardyń artyqshylyqtary da kemshilikteri de bar. Sony FDR-AX33 vlog túsirýge keremet apparat emes, degenmen, obektıvter men baptaýlardy aýystyryp otyrýǵa ýaqytyn ketirgisi kelmeı, jaı ǵana ádemi beınejazba túsirgisi keletinderge arnalady. Kamkorder beınejazbany jıi ári kóp jazatyndarǵa taptyrmas qural, oǵan qosa sýret sapasy da joǵarǵy deńgeıde, al 4K ajyratymdylyǵynda jazýǵa bolatyndyǵy montajdaý kezinde biraz erkindik beredi. Sony FDR-AX33 jańadan túsirip júrgenderge de saı keletin apparat.  Beıneniń turaqtylyǵy shtatıvti ózińmen birge alyp júrmeı, bárin qolmen ustap túsirýge múmkindik beredi. Aspazdyq shoý, týǵan kún nemese qalanyń ásem kórinisi sıaqty kez-kelgen beınejazbany qolǵa ustap túsirý múmkindigi kamkorderlerdiń aıryqsha ereksheligi.

Sony FDR-AX33 10 eseli optıkalyq zým bolýymen yńǵaıly, ıaǵnı sýretti sapasyn joǵaltpaı jaqyndatýyńyzǵa bolady. Eger kadr sol mezette qolmen túzeýdi talap etse, ondaı baptaýlary da qatar istep turady. Mundaı kameralardyń kemshiligine birjaqtylyqty jatqyzýǵa bolady. Eger ádemi, kólemdi orynǵa qosa adamdy jáne bulyńǵyr artqy kadrdy túsirgińiz kelse, onda kamkorderler sizge kómektese almaıdy.  

Mundaı kameralar operatorlyq isti úırengisi keletinderge emes, jaı ǵana ózine kontent jınaý úshin nemese otbasylyq beınejazbalar túsirýge arnalǵan. Eger siz beıne jumys quralyńyzdan lázzat ala otyryp, kásibı óskińiz kelse, onda Canon EOS M50 nemese Panasonic Lumix G7-ge kóz salyńyz. Tizimdegi dál osy eki kamera sizge tolyq baqylaý múmkindigi men shyǵarmashylyq erkindik bere alady. Biraq ol úshin biraz materıaldyq bólimin oqyp meńgerý kerek

.ARTYQSHYLYQTARY:

- Keremet turaqtandyrǵysh.
- Sýret sapasy.
- 4K.
- Shaǵyn jáne yńǵaıly.

KEMSHİLİKTERİ:

- Shyǵarmashylyq túsirilimge jaramaıdy.
- Jaryqtandyrý tómen kezinde shýdyń bolýy.

Alǵashqy kamerany tańdaǵan kezde barlyq blogerler aınaly Canon-ǵa nemese aınasyz Panasonic jáne Sony sıaqty úlken kameralarǵa umtylady. Biraq biz vlog pen aýqymdy beınejazbany túsirýge bolatyndaı, asa úlken emes, ári shaǵyn túrlerin sanaly túrde iriktep aldyq. Kamerany birneshe myń dollarǵa satyp alýǵa asyqpańyz, qoljetimdi túrlerinen, mysaly biz keńes bergen túrlerinen bastasańyz bolady.

---