InfoHub Logo

Jetpis jyl ómir súrgen bir pende, bar ǵumyryn kúnámen ótkizedi. Ómiriniń sońǵy sátinde qatty naýqastanyp tósek tartyp jatady. Biraq istegen kúnásine táýbe etip, ókinýmen bolady. Aqyrǵy sát taqap, Ázireıil jan alýǵa kelgende, eki kózinen jas parlap: «O Táńirim! Meniń bar kúnámdi óziń keshe gór!» — dep jylaıdy. Sońǵy sózin aıtyp úlgergenshe keýdesinen shybyn jany ushyp shyǵady.

Jan kóterilip otyryp jánnat baqshasynyń qaqpasyna keldi. Jumaqtyń qaqpasyn qaǵyp ishke kirgisi keletin nıetin bildiredi. Biraq, esik ashylmaıdy. Qaqpanyń arǵy jaǵynan:

 — Jánnat qaqpasyn uryp jatqan bul kim? Dúnıede jasaǵan qandaı izgi amaldaryń bar? — degen dybys shyǵady. Sosyn paqyrdyń jasaǵan bar kúnálaryn tizip sanap shyǵady da: «Men bilsem, sen jumaqqa kirmeısiń. Orny tozaq bolýy kerek. Qudaı dárgaǵynan ary ket,» — dep jaýap beredi. Kúnáhar pende:

— Iá Rabbym! Bul kimniń daýysy. Túrińdi kóre almaı turmyn, — deıdi. Daýys oǵan:

— Men Ǵaısa paıǵambardyń eń jaqyn serigi Petr bolamyn, — dep jaýap berdi. Kúnáhar:

— Áýlıe Petr, meni jarylqaı gór! Adam pendesiniń álsiz ekenin, al Qudaıdyń sheksiz meırimdi ekenin esińe al! Sen Ǵaısa paıǵambardyń janynda júrdiń. Onyń aıtqan nasıhatyn jaqynnan tyńdadyń. Biraq, Ǵaısanyń saǵan tań saharda uıyqtamaı, oıaý otyryp duǵa jasa dep úsh ret aıtqanyn umytyp, uıqyǵa kettiń. Al, paıǵambar basyn shaıqap, ókinip, júregi qan jylap edi ǵoı. Sony esińe túsirshi. Men de solaı ómirdegi mindetimdi umytyp, kúnáǵa battym. Sen Ǵaısamen birge bolamyn dep úsh ret ýáde berip ediń. Paıǵambardy ustap alyp, aǵashqa shegelegende sen odan bas tartyp qashqanyńdy umyttyń ba? Men de solaı álimsaqtaǵy ýádemdi umytyp kelip turmyn. Biraq, Qudaı meıirimmen kóz salyp, seni jánnatyna kirgizdi. Sen nege sodan úlgi alyp, maǵan meıirimmen qaramaısyń? — dep surady.

Qaqpanyń arǵy jaǵynda turǵan adam únsiz qaldy. Sosyn kúnáhar jánnat qaqpasyn ekinshi márte qaqty. Bul joly basqa bir dybys shyǵyp:

— Bul kim? Qandaı saýapty isiń bar? — dep surady da, ol da paqyrdyń bar kúnásin tizip shyqty. Sosyn: — Eı, qarabet, dúnıede ilip alar jaqsy amaly joq eken. Aýlaq ket, ornyń tozaq, — deıdi. Kúnáhar:

— Iá Jaratýshym, bul kimniń daýysy? — dep suraıdy. Daýys oǵan:

— Men Dáýit patshamyn, — deıdi. Kúnáhar:

— Oo, Dáýit patsha, men beısharany aıaı gór! Adam álsizdigi men Qudaı rahmetiniń keńdigin esińe al. Qudaı seni patsha etti, jurt aldyndaǵy dárejeńdi ósirdi. Baılyq ta, ataq pen dańq ta berdi. Al sen bir kedeıdiń ajarly áıeline ǵashyq bolyp, ony áıel etpek boldyń. Qansha malyń bolsa da, kedeıdiń sońǵy qoıyna kóziń tústi. Biraq, meıirimdi Qudaı, sonda da seniń dárejeńdi artyq etip, jánnatyna kirgizdi. Men de bireýdiń áıelin tartyp aldym, bireýdiń qoıyn urladym. Kúnáǵa belsheden battym. Sen «óz qateligim esime túskende, barmaǵymdy shaınap ókinemin» dep ediń. Men ólim sátinde sol sózińdi esime alyp, shyn táýbe ettim. Endi ne sebepti meni kirgizbeısiń, — deıdi.
Esik art jaǵynda daýys únsiz qaldy. Kúnáhar sálden soń qaqpany qaıta qaǵady. Bul joly basqa bir daýys shyǵyp:

— Bul kim? Jánnattyń esigin toqyldatqan qandaı jansyń? — dep suraıdy. Ol da kúnáhardyń bar isin tizip shyǵyp:

— Áı, pende, aýlaq júr. Sen mynadaı kúnáńmen jánnatqa kirýge saı emessiń, — deıdi. Kúnáhar:

— E, jasaǵan, bul kimniń daýysy, — dep suraıdy. Daýys ıesi:

— Men Ǵaısa paıǵambardyń súıikti shákirti Ioannmyn, — deıdi. Kúnáhar qýanyp ketip:

— Sen meni kirgizbeýge haqyń joq. Petr men Dáýit adam janynyń álsizdigi men Qudaı rahmetiniń sheksizdigi esine túskendikten maǵan lám demedi. Al sen ómir boıy Qudaıdyń súıispenshiligin, rahmetin nasıhattap keldiń. Meni tozaǵyna túsirmeı, jánnattyń esigine deıin ákelgen Táńirim sıaqty sen de maǵan súıispenshilik tanyt. Qartaıyp tósek tartqan kezimde, seniń kitabyńnan «Baýyrlar, bir-birińdi jaqsy kórińder!» — degen nasıhatty oqydym. Biraq, jurtty jaqsy kórýge, mahabbat tanytýǵa kesh qaldym. Táýbe ettim. Al, sen sol ósıetti jazyp turyp, qalaısha meni jaqsy kórmeısiń. Mahabbatpen jánnattyń esigin ashpaısyń ba? — dedi.

Sol kezde jánnat qaqpasy ashyldy. Ioann táýbaǵa kelgen paqyrdy qushaǵyna qysyp, keshirim surady. Ony Jaratýshy álemine alyp ketti.
 

Aýdarǵan: Júrsin Kárim

---