InfoHub Logo

Bala apasy men kókesiniń úıinde júrdi. Osy kisilerge tańǵalady. Áńgimeleri bir taýsylmaıdy. Únemi jarasyp otyrady.

Osy úıde turatyn aǵa-ápkeleri ústel basynan turyp ketkennen keıin de, kókesi men apasy shaıyn iship, áńgimelesip otyra berýshi edi.

Bala óziniń áke-sheshesi týraly oılady. Qysqa kúnde qyryq ursysady.

Sálden keıin kókesi shaıyn iship bolyp ornynan turdy. Apasy kókesine jyly júzben qaraıdy:
"Baıqa, belińdi aýyrtyp alma".

Bala apasynyń sózine kúlip jibere jazdady. Belin aýyrtyp alatyndaı bul kisi qartaıyp turǵan nemese naýqas adam emes qoı. Biraq apasy osy sózdi aıtýy muń eken, kókesi belin ustaǵan kúıi búkireıedi de qalady. Bala kókesiniń osy qylyǵyna tańǵalady.

Qulaǵyna óziniń áke-sheshesiniń daýysy keldi:

- Meni de bir túsinseń qaıtedi?!

- Osy, úıge kelgende senimen uryspaı-aq qoıaıynshy dep kelem!.. Seni
kórsem!..

- Sen tek salǵylasýdy ǵana bilesiń!..

Osy daýystardy estigisi kelmegendeı qulaǵyn basty.

- Áı, Álken, nege qulaǵyńdy basyp otyrsyń?!

Apasynyń daýysyn estidi.

- Bylaı tur, kókeń súrinip ketip júrmesin.

Apasynyń sózine kúlkisi keldi. Súrinip ketetindeı ol kisi bir naýqas kisi emes qoı. Onyń ústine kókesi bul otyrǵan jerge deıin jetemin degenshe, bul úsh turyp, úsh otyrar.

Kókesiniń júrisine qarap otyryp myrs etip kúldi. Beıne bir muz ústinde taıǵanaqtap kele jatyrǵan jandaı qybyr-qybyr etedi...

"Qalaı-qalaı isteıdi, á?!"

Kókesi qazir aýlaǵa shyqqannan keıin shapqylap ketedi. Aýladaǵy barlyq jumystardy tyndyratyn - osy kisi.

Esine teledıdardan estigen sózderi tústi. "Erli-zaıypty jandardyń jarasymdy tatýlyǵy úshin olardyń jan úılesimdiligi birinshi orynda turady".

"Sonda apasy men kókesi jany úılesken kisiler bolǵany ma? Al ákesi men sheshesi she?.."

Qulaǵyna taǵy da áke-sheshesiniń daýysy keldi:

- Meni de bir tyńdasań qaıtedi?..

- Seniń tyńdaıtyndaı jóni túzý bir áńgimeń bar ma?..

Bala taǵy da alaqanymen qulaǵyn basty.

---