InfoHub Logo

Túlki men tyrna dostasyp, birge turmaq bolypty, Ekeýi bir jerge qonystanypty. İship-jemegi ortaq. Biri jem izdep, saıahatqa ketkende, bireýi balapandar men kúshikterdiń janynda qalady.

Kúnderdiń kúninde tyrnanyń taz balapandaryna jún shyǵyp, jorǵalaıtyn bolady. Túlkiniń kúshikteri pushpaq bolyp qulpyrady. Analary balalaryn aýyq-aýyq jataqtyń janyndaǵy jaıdaqqa serýenge alyp shyǵyp júredi.

Bir kúni tyrna saıahatqa ketip, túlki balalardy baǵyp úıde qalady. Bárin serýenge alyp shyǵady, Balapandar men kúshikter apyr-topyr alysyp, oınap júredi. Ony kórip otyrǵan túlkige oı túsedi:

— Osy, meniń munym ne, myna tyrnanyń tuqymdarynyń mekeni - aspan. Jaıshylyqta bular Qudaıdan tilep ala almaıtyn tamaq qoı. Bul ári-beriden soń, ushady da ketedi. Sandy soǵyp biz qalamyz. Dostasatyn, bular meniń eki týyp, bir qalǵanym ba? Meniń myna kúshikterim de qus ustaýǵa úırenýi kerek. Qoı, kisi balasy kisige bala bolmaıdy. Odan da, – dep, tyrnanyń bir balapanyn tyrıtyp alyp uryp, kúshikterine qalaı ustap, qalaı óltirip, qalaı jeýdi kórsetedi.

Sóıte-sóıte kúshikter anasynyń baýlýymen bar balapandardyń basyn qurtady. Óltirgen balapandaryn aýlaqqa aparyp, tyǵyp tastaıdy da qaıtyp jataqqa jaılasady. Keshinde tyrna qaıtady. Túlki tyrnanyń aldynan shyǵyp, jylamsyraıdy.

Tyrna:

— Eı, ne boldy? – deıdi.

Túlki:

— Áý, bilmeımin. Balalardyń sany az kórinedi – deıdi.

Tyrna apalaqtaı sasqalaqtap:

— Joǵy seniki me, meniki me? – dep suraıdy.

Tyrnany qyjyrta keketip:

— Áı, baıǵus-aı, oıyńnyń aramy-aı, qansha baýyrǵa tartsam da bólektengen sózińniń ushqyny shyǵady da turady. Balapandardy seniki, meniki deýshi me edik, – depti qý túlki.

---