InfoHub Logo

Elimizde onlaın-saýda naryǵy jyl saıyn 30 paıyzǵa artyp keledi. Ondaǵy eń iri ınternet-dúken Satu.kz. 2017 jyly qazaqstandyqtar osy dúkenge 20,144 mlrd teńge qarjylaryn jumsap, 508 myń taýar satyp alypty. 2017 jyly QR elektrondyq saýda naryǵynyń kólemi 106,9 mlrd teńgeni quraǵan. Al, 2018 jyldyń 5 aıyndaǵy elektrondyq saýda naryǵynyń kólemi 101 mlrd teńgeni nemese bólshek taýar aınalymynyń jalpy kóleminiń 2,9 paıyzyn kórsetken.

Álemdik e-kommersıa qarqyndy damý ústinde. Elektrondy saýdasy damyǵan alpaýyt memleketterge keletin bolsaq, eń aldyńǵy oryndy 681 mlrd dollarmen Qytaı alady. Artynsha, AQSH (438 mlrd dollar), úshinshi oryn bolsa Ulybrıtanıaǵa tıesili (196 mlrd dollar).

Álemdik úzdik ınternet-dúkenderge Qytaı men AQSH memleketteriniń enshisindegi kompanıalar kiredi. Máselen, qytaılyq kompanıa Alıbaba, AliExpress, AQSH memleketine tıesili Zappos, Ebay, Amazon, Itunes jáne t.b.

Qazaqstandaǵy ınternet-dúkenderdiń ondyǵyna – Tehnodom, Lamoda Qazaqstan, Kaspi, Yves Rocher, Tickets.kz, Aliexpress, Flip.kz, Sulpak.kz, Chocotravel.com, Otto-trade.kz kiredi.

Tehnodom

Elektronıka, turmystyq tehnıka, kompúter satatyn elimizdegi eń iri onlaın-dúken — Tehnodom. Onyń taýar katalogynda 15 myń ónim kórsetilgen. Sapaly qyzmet pen jaqsy usynystar atalǵan dúkenniń tanymaldylyǵyn arttyrýda. Máselen, kez kelgen taýardy onlaın arqyly 12 aıǵa bólip tóleýge alýǵa bolady. Ol Qazaqstannyń 17 qalasy boıynsha jumys isteıdi. Al, jetkizý ýaqyty 3 saǵatty quraıdy.

Lamoda Qazaqstan

Lamoda katalogynda negizinen kıim túrlerimen birge aıaq kıim, kosmetıka, aksesýarlar jáne t.b usynylǵan. Keń kólemdi assortımenti men eýropalyq deńgeıdegi qyzmeti arqyly turǵyndarǵa jaılylyq usynyp jatyr. Dúken 80-nen asa memlekettiń kásipornymen kelisim-shartqa otyrǵan. 2017 jyly onlaın-dúkeni arqyly 23,1 mlrd tenge qarajat túsken.

Kaspi

Kaspi mobıldi baǵdarlamasy arqyly úıden shyqpaı-aq, saýda jasaýǵa bolady (elektronıka, telefon, gadjetter, jıhazdar jáne t.b.). Internet-dúkenniń byltyrǵy tabysy 54,8 mlrd teńgeni qurady.

Yves Rocher

Yves Rocher kompanıasy fransýz parfúmdary men kosmetıkasyn usynady. Munda shash, bet, dene kútimine arnalǵan taýarlar bar. Sondaı-aq, erler men áıelderge tıimdi syılyq alýǵa bolady. Yves Rocher 1959 jyly quryldy. Onyń ónimin 80-ge jýyq el tutynady. Munda 700-den asa taýar túri bar.

Tickets.kz

Tickets.kz — bıletke tapsyrys berýge arnalǵan qyzmet. Ol óz qyzmetin 2010 jyly bastaǵan bolatyn. Osy saıttyń kómegimen temirjol bıletteri men avıa bıletterge álemniń qaı túkpirinde júrse de tapsyrys berýge bolady.

AliExpress

AliExpress onlaın-saýda naryǵyndaǵy eń mańyzdy oıynshylardyń biri. Ol álemdik deńgeıdegi onlaın-dúken retinde barshamyzǵa belgili. Ol bastapqyda Qytaı eliniń ónimderin álemdik aınalymǵa shyǵarý úshin qurylǵan bolatyn. Dese de, qazirgi tańda bul kompanıanyń qyzmetin tutynýshylar sany jyldan jylǵa artýda. Álem elderiniń 200 asa memleketi osy kompanıanyń qyzmetin tutynady. Tipti, Afrıka elderindegi eń kedeı memleket sanalatyn Zımbabve de AliExpress-ti paıdalanady eken. Óıtkeni, mundaǵy taýar baǵasy arzan, jetkizý ýaqyty da tez jáne sapaly taýar túrlerin usynady. Atalǵan kompanıa Alibaba kásipornyna tıesili. Onyń tabysy 2017 jyly 9,791 mlrd dollardy qurady.

Flip.kz

Flip.kz ınternet-dúkeni 2007 jyldyń 20 qarashasynda qurylǵan bolatyn. Osy ýaqyt aralyǵynda kompanıa taýar kólemin keńeıtip qana qoımaı, elimizdiń túkpir-túkpirinde óz fılıaldaryn ashty. Bastapqyda bul kompanıa tek kitaptar ǵana satatyn, qazirgi tańda oıynshyqtar, úıge qajetti taýarlar, kompúterlik oıyndar, baǵdarlamalyq qamtamasyz etý men beınejazba ónimderin satyp alýǵa bolady. Tólem júıesi bank kartasy nemese Webmoney jáne KZM mobıldi baǵdarlamasy arqyly júzege asady.

Sulpak.kz

Sulpak.kz óziniń ınternet-dúkenin 2009 jyly ashqan bolatyn. Búginde bul kompanıany ınternet-gıpermarket dep atasaq ta bolady. Óıtkeni, munda taýarlar túri kóp. Máselen, elektronıka, kompúterler, turmystyq tehnıkalar, foto jáne vıdeo taýarlary, keńse tehnıkasy, telefon jáne baılanys, oıyndar jáne baǵdarlamalyq qamtamasyzetý baǵdarlamalary enedi. Atalǵan kompanıanyń fılıaldary Qazaqstannyń barlyq qalasynda bar.2017 jyly Sulpakkompanıasynyń taza tabysy 8,03 mlrd teńgeni qurady. Al, 2016 jyly 1,79 mlrd teńgeni kórsetken bolatyn.

Chocotravel.com

Chocotravel.com – 2013 jyly qurylǵan Qazaqstannyń barlyq aýmaǵyn qamtyp jatqan ınternet-dúken. Qazirgi tańda Chocotravel.com onlaın-saýda naryǵyndaǵy kóshbasshylardyń biri. Atalǵan saıttan úıde otyryp-aq, bıletti elektrondy formatta alýǵa bolady. Orta aılyq qaralym shamamen 100 myńdy quraıdy.

Otto-trade.kz

Otto-trade.kz – eýropalyq taýarlardy tikeleı satyp alýǵa bolatyn ınternet-dúken. «Otto» konserni 70 jyl boıy naryqta aldyńǵy oryndardan kórinip keledi. Ol óziniń tutynýshylaryna eýropalyq dızaınerlerdiń kıimderin usynady. Máselen, Arizona, MixSixty, Adidas, Geox, Levi’s jáne t.b. Otto-trade katalogynda 1 mln kıim-keshek túrleri men aksesýarlar qamtylǵan. Saıttaǵy orta aılyq qaralym — 34 myńdy kórsetip otyr.

Elimizde onlaın-saýda kún ótken saıyn jańa qarqynmen damyp keledi. Oǵan sebep — halyqtyń ınternetke qoljetimdiligi men áleýmettik jelilerdiń damýy. Internet arqyly satý da, satyp alý da óte ońaı. Sondaı-aq, onlaın-saýda naryǵyndaǵy kásipkerler legi artýda. Bul óz kezeginde halyqtyń ál-aýqatynyń artýyna jaǵdaı jasaýda. Al, tólem júıesine keler bolsaq, arnaıy termınaldar nemese bank kartalary arqyly júzege asady. Osy rette, qazaqstandyq bankterdiń de qyzmet kórsetý aıasy keńip keledi.

---